Болугур – тарбахтарыгар талааннаах маастардар уутуйан үөскээбит сирдэрэ. Кинилэртэн биирдэстэрэ – норуот маастара, Амма уонна Болугур нэһилиэктэрин бочуоттаах олохтооҕо Валентина Стручкова – Сарыада Уус айар быыстапката бүгүн Дьокуускайга Норуоттар доҕордоһууларын дьиэтин “Симэх” галереятыгар турда.
Кэрэни кэрэхсээччилэр бу күн Валентина Васильевна 40 сыл устата айбыт-туппут баайыыларын, быысабайдарын дуоһуйа көрдүлэр, маастарыстыбатын өссө төгүл сөхтүлэр-махтайдылар. “Айар кутум иэйиитэ” быыстапка үөрүүлээх аһыллыытыгар биир дойдулаахтара, Дьокуускай куорат олохтоохторо, биллэр маастардар кыттыыны ыллылар, эҕэрдэлээтилэр. Быыстапка аһыллыбытын туоһулуур аалай лиэнтэни “Симэх” галерея дириэктэрэ Яна Игнатьева, Александр Гоголев — Сатал Уус уонна Валентина Стручкова быстылар. Маастары үөрүүлээх күнүнэн төрөөбүт Болугуруттан нэһилиэк баһылыга Андрей Петров, М.А. Ноговицын аатынан “Түмэн” култуура кииниттэн Евдокия Платонова, улуустааҕы култуура салалтатыттан фонда специалиһа Ольга Судинова, “Симэх” галерея дириэктэрэ Яна Игнатьева, биир дойдулаахтар түмсүүлэрин аатыттан А.С. Захарова уонна аймахтара, доҕотторо, элбэх киһи үөрүүтүн үллэстэн эҕэрдэлээтилэр, бэлэхтэри туттардылар, тыыннаах сибэккинэн симээтилэр, баҕа санааларын, элбэх үтүө тыллары эттилэр. Тэрээһин силигин ситэрэн Амма кыыһа, Олоҥхо театрын артыыската Күннэй Николаева Валентина Васильевнаҕа анаан тойук туойан мустубут дьон куттарын-сүрдэрин тутта.
-Өрөспүүбүлүкэбит килбэйэр киинигэр айар үлэм быыстапката турбута – бу элбэх киһи сыралаах үлэтин түмүгэ. Чугас дьонум, Иван Иванов салайааччылаах улуустааҕы култуура управлениетын, Александр Кузьмин салайааччылаах Дьокуускайга олорор аммалар түмсүүлэрин чилиэннэрэ бука бары өйөбүл, көмө буоланнар маннык киэҥ араҥаҕа быысапкаларбын, баайыыларбын аҕалан туруорар кыахтаммыппар хас биирдиилэригэр махталым муҥура суох,- диэн дьоро күн “буруйдааҕа” Валентина Стручкова үөрүүтүн үллэстэр.
Быыстапка сэтинньи 5 күнүгэр диэри туруоҕа, кэлиҥ, сэргээҥ, кэрэҕэ кыттыһыҥ.
Ольга СУДИНОВА.