Оҕолорбут кыра саастарыттар спорт араас көрүҥэр дьарыктаналлар. Амма Наахара нэһилиэгэр спортивнай көрүүлээх үгүс дьон олорор. Манна араас элбэх тэрээһиннэр быыстала суох ыытыллаллар. Күрэхтэри нэһилиэк спорт саалатын дириэктэрэ Мария Заборовская, ыччат лидера Мичил Ефремов сэргэхтик тэрийэллэр.
Эдэр ыччат, оҕо маассабай кэрэхсээһинин ылбыт спорт көрүҥнэриттэн биирдэстэрэ футбол буолар. Ыччат сынньалаҥ кэмин, сайыҥҥы нуурал киэһэтин футбол, волейбол көрүҥэр элбэхтик аныыр. Сайыҥҥы киэһэҕэ көрдөөх хаһыы-ыһыы элбэхтик иһиллэр, эдэр саас «тохтоон, миигин көр» диэбиттии олохтоохтору спортка угуйар. 2003 сыллаахха саҥа таас оскуола үлэҕэ киирэн үгүс оҕо дьиктилээх спортивнай былаһааккаттан тэйбэккэ күн бүгүҥҥэ диэри футболу, волейболу өрө тутар. Аммаҕа «Дружба» спортивнай саалатыгар нэһилиэктэр икки ардыларыгар комплекснай спартакиада чэрчитинэн футбол күрэҕэ буолан ааста. Күрэххэ Чапчылҕан, Эмис, Соморсун, Амма, Чакыр, Абаҕа, Бөтүҥ, Өнньүөс нэһилиэгин хамаандалара кытыннылар. Күрэх соругунан кэлэр кэнчээри ыччаты спортка уонна чөл олоххо сыһыарыы тэрилиннэ. Футбол тулуурга, сымса буолууга, хамаанданан бииргэ оонньууга, түргэн толкуйга спортсменнары түмэр.
Амма Наахара хамаандатыгар ыччаттарбыт вратарь Евгений Ефремов, көмүскээччилэр Лаврентий Тарский, Мичил Ефремов, нападающайдар Данил Ефремов, Василий Егоров, Дмитрий Стручков улахан дэриэбинэлэртэн хаалсыбакка ситиһиилээхтик кыттан 2-с бочуоттаах миэстэ буолан нэһилиэктэригэр наадалаах баалы аҕаллылар. Бастакы миэстэни Амма, үһүс миэстэни Чакыр хамаандалара ыллылар. Тыҥааһыннаах күрэх кыттааччылара күрэхтэн астынан, сэргэхсийэн тарҕастылар.
Ирина КОРЯКИНА-ОЛЕСОВА