Үлэ Геройа П.И.Яковлев аатынан Амма Наахара орто оскуолатыгар Амма улууһугар быйыл үлэтин саҕалаабыт өрөспүүбүлүкэтээҕи уйулҕа кииниттэн тахсан үөрэнээччилэри, төрөппүттэри кытта үлэлээтилэр. Бөлөххө анал үөрэхтээх исписэлиистэр Туяра Окоемова, Аина Неустроева, Амма улууһугар сокуоннай сааһын ситэ илик оҕолор дьыалаларын инспектора Лилия Никифорова уонна сокуоннай саастарын ситэ илик оҕолор дьыалаларын көрөр итиэннэ оҕо быраабын көмүскүүр хамыыһыйа исписэлииһэ Изабелла Яковлева бааллар.
Бу көрсүһүү өрөспүүбүлүкэ үрдүнэн ыытылла турар уйулҕа ыйыгар сөп түбэһиннэрэн оҕо буруйу оҥорууттан сэрэтэр, бэйэ икки ардыгар куһаҕан дьайыылары оҥорбот, тыйыс сыһыаннаһыыга тиийбэтин туһугар сыаллаах ыытылынна. Хамыыһыйа улуус баһылыгын солбуйааччы Ньургуйаана Илларионова сүбэтинэн Амма улууһун оскуолаларынан сылдьан үөрэнээччилэргэ, төрөппүттэргэ, учууталларга көмө оҥороро олус биһирэннэ. Бүгүҥҥү үлэҕэ орто бөлөх үөрэнээччилэригэр улаатан эрэр оҕо бэйэтин ыраастык туттуутугар, оҕо бэрээдэги кэһиитигэр болҕомто уурулунна. Онтон улахан кылаас үөрэнээччилэригэр оҕо оҕону кытта сыһыаныгар, дьиэ кэргэҥҥэ уонна тулалыыр эйгэ оҕоҕо тыйыс сыһыаныгар, дьиэ кэргэн олох сүрүн тутааҕа буоларын бигэргэтэр тренинговай уруок ыытылынна. Ол кэннэ үлэ хамыыһыйатын баттаһа төрөппүт уопсай мунньаҕа буолла.
Үөрэнээччилэр, төрөппүттэр араас боппуруостары исписэлиистэргэ биэрэн сөптөөх хоруй ыллылар. Маннык араас үлэ хамаандалара кэлэн тэрээһиннэри тэрийэллэрэ ыраах түөлбэлэнэн олорор нэһилиэккэ, тэрилтэлэргэ, ыалларга олус туһалаах. Оҕо төрөөбүт сирин таптыыр, бэрээдэктээх, эппиэтинэстээх, барыга убаастабыллаахтык сыһыаннаһар буола улаатыан хайа төрөппүт баҕарбат буолуой! Таһаарыылаах, барыбытыгар туһалаах үлэ хаартыскаҕа түһүүнэн, махтал тылларынан түмүктэннэ.
Ирина КОРЯКИНА-ОЛЕСОВА