С.Я. Левин аатынан Бөтүҥнээҕи култуура киинэ бэйэтин 49-с култуурунай сезонун бэрт сэргэхтик арыйда. Көрөөччүлэригэр анаан «көмүс билиэттэри» оонньотто, Сахабыт эстрадатын чаҕылхай сулуһа Эрчими аҕалан ыалдьыттатта, нэһилиэги кэпсиир киинэни, ону кытта саҥа ырыаны сүрэхтээтэ.
Улуус култуураларын дьиэнин ортотугар биир бастыҥ үлэлээх кулуубунан С. Я. Левин аатынан Бөтүҥнээҕи култуура киинэ буолар. Манна дириэктэринэн хаһыс да сылын Анна Яковлева таһаарыылаахтык үлэлиир. Уус уран салайааччы Саина Попова, исписэлиистэр Марианна Кырбасова, Константин Попов уонна да атыттар айымньылаахтк үлэлииллэр. Кинилэр ыытар тэрээһиннэригэр бэл диэтэр ыаллыы сытар нэһилэктэртэн кытта кэлэллэр. Ол куруутун сонунтан сонун бырайыактары көрөөччүлэригэр бэлэхтииллэр. Бу да сырыыга эмиэ 49-с култуурунай сезоннарын бэрт сэргэхтик аһаннар саала иһэ толору киһинэн туолла. Быйылгы сезоннарын кулууптар ситиһиилээх көрсөллөр. Ол курдук «Култуура» национальнай бырайыагынан өрөспүүбүлүкэ үрдүнэн 17 кулууп иһигэр киирэн улахан киинэ көстөр экранын ыланнар, билигин тахсар киинэлэри хайа баҕарар көрөр буоллулар. Бу күн кинилэр улуустааҕы култуура управлениетын «Ситим» бырайыагынан уһуллубут нэһилиэктэрин историятын, кэрэ бэлиэ сирдэрин, үгэстэрин көрдөрөр киинэни бар дьонноругар улахан экраҥҥа көрдөрдүлэр. Ол иннинэ дьоро күҥҥэ киинэ экранын арыллар бэлиэ түгэнэ тосхойон аалай лиэнтэ быһылынна. Лиэнтэни култуура уонна норуот айымньытын управлениетын салайааччыта Иван Иванов, Бөтүҥ нэһилиэгин баһылыга Алексей Никитин уонна култуура киинин дириэктэрэ Анна Яковлева быстылар.
Иван Федорович эҕэрдэтин тириэрдэн, Бөтүҥ нэһилиэгин туһунан киинэ бары ирдэбиллэргэ эппиэттиир гына оҥоһуллан 14 нэһилиэктэн саамай ордуктара буолбутун, онон 50000 солк сертификатынан наҕараадаланарын туһунан этэн туран, ол туоһутун дохсун ытыс тыаһын ортотугар туттарда.
Сезон арыллыытыгар нэһилиэк уус уран самодеятельноһын көхтөөх кыттааччылара ылбаҕай ырыалары, көрдөөх сценкалары, кэрэ үҥкүүлэри бэлэхтээтилэр. Онтон эдэр састааптаах култуура киинин үлэһиттэрэ көрөөччүлэригэр саҥа айыллан тахсыбыт бэйэлэрин кииннэрин өрөгөй ырыатын бэлэх ууннулар. Бу ырыа тылларын биир дойдулаахтара Ирина Корякина-Олесова суруйбут, музыкатын Василий Татаринов- Хоту Уолан суруйбут. Көрөөччүлэр саҥа ырыаны дохсун ытыс тыаһынан көрүстүлэр. Биэчэри Эрчим дьон кутун тутар ырыаларынан киэргэтэн, сааланы кытта ыкса ситимнэһэн бөтүҥнэр култуурунай сезоннарын арыйдылар. Бу күн икки «көмүс билиэт» оонньонон, сүүйүүлээхтэр кэлэр сыл бу күнүгэр диэри буор босхо киинэҕэ сылдьар быраабы ыллылар.
«Амма олоҕо» хаһыат