Амма улууһугар Олоҥхо сылын чэрчитинэн улуус киинин “Сардаана” уһуйааныгар «Мин олоҥхо дойдутун оҕотобун» диэн эйгэ тэрилиннэ. Саха оҕото кыра эрдэҕиттэн төрөөбүт төрүт буоруттан силис тардан, норуотун үгэстэрин этигэр-хааныгар иҥэринэн, сахалыы куттаах-сүрдээх, төрөөбүт дойдутун таптыыр, культуратын иҥэриммит киһи буола иитиллэн, сайдан тахсыахтаах диэн өйдөбүлтэн маннык балаҕан баар буолла.
Быйылгы үөрэх дьылыгар туруорбут сыалбытын ситэн балаҕаммыт аанын тэлэччи аһыллар үөрүүлээх чааһыгар ыҥырыылаах дьоммут, үлэһиттэр, бэтэрээннэрбит Ольга Митрофановна Федорова, Таисия Моисеевна Попова күндү ыалдьыт буоллулар. Кинилэри сахалыы сиэринэн-туомунан кымыстаах чороонунан айах тутан көрүстүбүт. Уһуйаан иккис мэндиэмэнин «Мин олоҥхо оҕотобун» диэн олоҥхо дойдутун ойуулаан истиэнэҕэ уруһуйдаабыппытын, үс дойдуну көрдөрбүппүтүн, өбүгэлэр туттар малларынан ситэрэн-хоторон биэрбиппитин кэлбит дьон бары сөҕө-махтайа көрдүлэр.
Дьоҕус музейбытын арыйар лентаны Амматааҕы үөрэх салалтатыттан уопсай үөрэхтээһин уонна мониторинг салаатын сүрүн исписэлииһэ Вера Васильевна Чупрова, информационнай-методическай салаа сүрүн исписэлииһэ Эмма Валерьевна Давыдова, уһуйаан оҕону сайыннарар киинин методиһа Диана Владимировна Попова быстылар.
Сахалыы эйгэ уһуйааҥҥа олохсуйар сиэрин-туомун силигин ситэрэн биэрэн алгысчыт Василий Кочаткин аал уоту оттон ыраастаата, араҥаччылаата.
Мантан салгыы Олоҥхо күнүн чэрчитинэн ыытыллыбыт Ѳрѳспуубулукэтээҕи «Үс сулус» күрэх Кылаан – чыпчаал кыайыылаахтарын толорууларыгар уһуйааммыт иитээччитэ Ульяна Николаевна Прокопьева «Хороҕор муостаах, соҕотох ынахтаах Хоборооонньо эмээхсин» олоҥхо – остуоруйатын кэлбит дьон интэриэһиргээн иһиттилэр. Бэлэмнэнии уонна улахан бөлөх оҕолоро Иванова Валерия, Аммосова Айыллаана, Дордосов Сарыал, Марсанова Аделина, Попов Сайдам, Романова Ева, Артемьева Лиза, Суздалов Кирилл, Малыкайцева Диана олоҥхо кэрэ дойдутун туһунан кэпсээтилэр.
Оҕо кыра сааһыттан өбүгэ үгэстэригэр сүгүрүйдэҕинэ, олоҕун-дьаһаҕын биллэҕинэ, сиэрин-туомун тутустаҕына дэгиттэр сайдара, инникилээх буолара саарбаҕа суох. Итиннки санааны тутуһан “Сардаана” уһуйаан иитээччилэрэ төрөөбүт тыл сайдыытыгар күннэтэ үлэ ыытабыт.
Евдокия Захарова.