Оһуохай — олохпут үҥкүүтэ

Бүгүн Сахабыт сиригэр аан бастакытын Оһуохай күнэ бэлиэтэнэр. Бырааһынньык 2023 сыллаахха Ил Дархан Айсен Николаев балаҕан ыйын 7 күнүнээҕи Ыйааҕынан ылыныллыбыта.


Саха дьоно Оһуохай күнэ бэлиэтэнэр буолбутун өрө көтөҕүллэн үөрэн көрсүбүттэрэ. Оһуохай бу сахалар төрүт, өй-санаа бииргэ түмсэр үҥкүүтэ. Ил Дархан бу Ыйааҕын сүрүн соругунан  саха төрүт үҥкүүтүн  оһуохайы харыстааһын уонна киэҥ эйгэҕэ тарҕатыы буолар.  Бүгүн Оһуохай күнүнэн Амма улууһун айар куттаахтара Дария Васильева-Амма Даайыс, Оксана Кривогорницына — 40годовна,  Таттяна Семенова — Татыйаас төрүт үҥкүүбүтүгэр анаабыт  хоһооннорун сэҥээрэ ааҕаргытыгар.

ОҺУОХАЙ -ОЛОХПУТ ҮҤКҮҮТЭ!

Ийэ сир ирээтин,
Күөх ото быгаатын,
Үрүҥ ас барахсан
Үрүлүйэ устаатын,
Оо,саха үөрдэҕиэн,
Оо,тыыллан турдаҕыан,
Оһуор-ойуу симэхтээх
Тирэҥсэтин кэтэ охсон,
Оһуохайдыы ойдоҕуон!

Оһуохайдыыр оонньууларга
Сиртэн тэйэ тэбинэн,
Өрө күүрэн,тыый,доҕор,
Эр киһибит барахсан
Хара хаанын хамсаттаҕа,
Дьахтар киһи имэҥирэн
Имин хаанын
Тэтэртэҕэ!

                   ОҺУОХАЙ —
ОЛОХПУТ ЭРГИМТЭ ҮҤКҮҮТЭ,
ОҺУОХАЙ —КҮНДҮ КҮММҮТ
КҮЛҮМНҮҮР ИИТЭ!

                                      Амма Даайыс

ОҺУОХАЙ
Оһуохайдыыр оһуохай
Эһиэкэйдиир эһиэкэй
Илиилэртэн ылсыһан,
Эгэл-тэгэл үктэнэн
Төгүрүччү хаамсыаҕын,
Баҕа санаа бастыҥын
Бар дьоҥҥо ааныаҕын,
Айылҕаттан күүс ылан
Киэҥ куйаарга көтүөҕүн.
Сирбит-уоппут чэлгийдин
Күөх халлааммыт көҕөрдүн,
Күммүт уота сылыттын
Эйэлээх олоҕу түстээтин.
Оһуохайга эргийэн
Күүстэ-уохта ылыаҕын,
Сахалыы сайаҕас
Санаабытын сааһылаан,
Сайдар- үүннэр суоллары
Сатанарынан туойуоҕун
Сырдыгы, кэрэни
Сааһылааммыт түстүөҕүн.
                                                    40годовна

ОҺУОХАЙ

Эмэн саастарбын кэннибэр хаалларан,
Эдэр-эмньик кэммэр төннөн ыламмын,
Элэккэй дьикти нуһараҥ эйгэҕэ
Эйэҕэс долгураҥар уйдарабын.

Эгэйэ-дэгэйэ тоҥолохтон тутуһан,
Эҥсиилэнэн этиллэр тыллардаах
Эгэрэҥ-дэгэрэҥ оһуохайга
Эдэрдии эрчимнээхтик дайабын.

Аламай маҥан күннүү төгүрүк,
Алгыстаах алаадьылыы төгүрүк,
Алыптаах эргимтэ буолан-кырдьык
Айыы сирэ куйаардыын ситимнэстэ.

Уратыттан ураты дьикти дьыл кэмнээх,
Уйгулаах-быйаҥнаах кэрэ айылҕалаах,
Унаар буруота субуллар норуоттаах,
Улуу Сахам сирин кэлэр кэнчээритин

Үрүҥ күн үҥкүүтүн тыыннаах тойуга
Үрдүк айыыларынан саргытын салайтарда,
Үйэлэргэ алмаастыы дьэргэтэ күлүмнэттэ,
Үс саха үлүскэн үллэр күүһүн үүннэрдэ.

                                                                   Татыйаас

 

Хаартыска: Александра Малыкайцева

Читайте дальше