Балаҕан ыйын 8 күнүгэр «Хардыы» түөлбэ спортивнай былаһааккатыгар Амма нэһилиэгин дьаһалтата, «Хардыы» уонна «Алаас» түөлбэлэр көҕүлээһиннэринэн аан бастаан түөлбэлэр ортолоругар 2013-2016 сыллаах төрүөх оскуола оҕолоругар мини-футболга бэрт сэргэх, өрө күүрүүлээх күрэхтэһии буолла.
Уопсайа аҕыс оҕолоох биэс хамаанда түмүллэн кэлэн оонньоотулар. Күрэхтэһиини Петр Платонов уонна футбол федерациятыттан бэрэстэбиитэл кэлэн дьүүллээтилэр. Эбиэт кэмигэр кырачаан футболистарбытын сылаас чэйинэн, итии борщ миининэн аһаттыбыт.
Түмүккэ «Крестях» хамаандата кыайыылаах таҕыста, иккис миэстэ «Цыганское братство», үһүс «Алаас» хамаандалара буоллулар. Маны таһынан бастыҥ оонньооччулар ааттара билиннэ. «Бастыҥ вратарь» Милан Неустроев, «Бастыҥ бомбардир» Уйгулаан Платонов, «Бастыҥ оонньооччу» Марк Попов буоллулар. Кыайыылаах хамаандалар харчынан бириэмийэлэри уонна грамота, мэтээл туттулар. Бастаабыт хамаанда 8000 солкуобай , иккис миэстэлээх 6400 солкуобай, үһүс миэстэ 4000 солкуобай суумалаах туоһу суруктарынан наҕараадаланнылар. Оҕолор да, төрөппүттэр да олус астынан тарҕастылар.
1 миэстэ "Крестях" хамаанда
2 миэстэ "Цыганское братство" хамаанда
3 миэстэ "Алаас" хамаанда
Оҕолор оонньуулларыгар күммүт-дьылбыт да туран биэрдэ. Кырачаан футболистарбытыгар үөрэхтэригэр, спорка ситиһиилэри баҕарабыт. Төрөппүттэргэ оҕолоругар кэлэн өйөбүл, тирэх буолан, «болельщиктаан» барбыттарыгар тэрийээччилэр ааттарыттан махтанабыт. Мини-футбол оонньууга бастакы хардыыларын оҥорбуттарынан бары кыайыылаахтарбытын, кыттааччыларбытын эҕэрдэлиибит.
Александра ЕГОРОВА, «Хардыы» түөлбэ олохтооҕо.