Соморсуннар күһүҥҥү күргүөмнээх үлэлэрин субуотунньуктартан саҕалаатылар. Балаҕан ыйын 9-13 күннэригэр нэһилиэк олохтоохторо көҕөрдүү уонна анал байыаннай дайыыга көмөлөһөн харысхал сиэккэлэри баайыы үлэлэригэр таҕыстылар.
Бастакы күн Афанасий Рязанскай аатынан орто оскуола оҕолоро нэһилиэк уопсай сынньанар сирдэрин: искибиэрдэри, Албан аат болуоссатыгар баар үүнээйилэри күһүҥҥү сыыс отторун ыраастаан, эбии буор кутан аһатан биэрдилэр, мас олордуллар дьаамаларын хастылар. Сарсыҥҥытыгар Соморсуннааҕы баһаарынай чаас, олох-дьаһах коммунальнай хаһаайыстыба, култуура киинин, олохтоох дьаһалта үлэһиттэрэ искибиэргэ уонна болуоссакка — уопсайа отуттан тахса маһы, талаҕы эбии олортулар.
Надежда Васильева салалтатынан нэһилиэк олохтоохторо сайын устата харысхал сиэккэлэри баайыыга тиһигин быспакка, чааһынай олбуорга мустан баайдылар. Ол курдук Изабелла Конникова, Мария Смитина, Александра Егорова, Марина Чикальдина, Евдокия Курчатова, Ирина Федорова, Ирина Протопопова, Мария Лебедева көхтөөхтүк кыттыбыттара.
Бу күннэргэ нэһилиэк тэрилтэлэрэ бу бачыымы өйөөн, биирдии күнүнэн аттарынан субуотунньуктуу сылдьаллар. Кинилэргэ эбии нэһилиэк дьиэҕэ олорор бэтэрээннэрэ Августа Парфенова, Егор Чемезов, Антонина Степанова, Мария Старостина уонна да атыттар күүс-көмө буолаллар, онон ытык-мааны дьоммутугар Кыайыы туһугар тус кылааттарын иһин махтанабыт.
Ити курдук соморсуннар күһүҥҥү көдьүүстээх үлэлэри тэтимнээхтик тэрийэннэр, 2024-2025 үлэ, үөрэх сыла көхтөөхтүк саҕаланна.
- Надежда БЕЛОЛЮБСКАЯ,
- Соморсун нэһилиэгин баһылыгын солбуйааччы.