Дойду Бэрэсэдьиэнин талар быыбарга дьон көхтөөхтүк, өрө көтөҕүллэн турар кытталлар. Аҕам саастаах, доруобуйаларынан хааччахтаах дьон быыбардыыр бырааптара толору тутуһуллан, кинилэр биэрбит сайаапкаларынан учаастактааҕы быыбар хамыыһыйалара дьиэлэригэр тиийэн куоластаталлар.
Дьиэлэргэ тиийэн хамыыһыйа чилиэннэрэ бары ирдэбиллэри тутуһан быыбары ыыталлар. Амматааҕы территориальнай хамыыһыйа иһитиннэрбитинэн, сайаапканан кулун тутар 16 күнүн түмүгүнэн 424 быыбардааччы куоластаата.
«Быыбарга 90-нарын ааспыт ытык кырдьаҕастарбыт бэйэлэрэ бюллетеннэрин толорон, талбыт кандидаттарыгар куоластарын биэрдилэр. Ол курдук холобура Болугурга 96 саастаах Александра Михайловна, 92 саастаах Мария Николаевна Гермогенова, Аммаҕа 94 саастаах Евдокия Алексеевна Неустроева уонна да атын ытык кырдьаҕастарбыт сэргэхтик куоластарын биэрдилэр уонна эдэрдэргэ холобур буоллулар.
Санатан эттэххэ, ким кыайан быыбардыыр учаастакка кэлбэт, сарсын күнүс 2 чааска диэри быыбардыыр учаастакка эрийэн этиэххитин сөп. Оччоҕо эһиэхэ хамыыһыйа чилиэннэрэ тиийэн куоластатыахтара», — диэн улуустааҕы ТИК бэрэссэдээтэлэ Наталья Алексеева иһитиннэрдэ.
«Амма олоҕо» хаһыат