Бүгүн Николай Захаров-Сахаачча төрөөбүтэ 75 сылын көрсө ыытыллар тэрээһиннэргэ даҕатан Аммаҕа аатырбыт тустууктар Владимир Егоров уонна Виктор Рассадин ыалдьыттаатылар.
Бу күннэргэ Сахаачча аатынан күрэх үгэнэ. Сарсын түмүктүүр киирсиилэр буолуохтара. Саха сирин элбэх улууһуттан эдэр, кэскиллээх бөҕөстөр күүстэрин тургута кэллилэр. Кинилэр бу күрэххэ атын дойду ааттаахтарын, тэгил дойду тэҥнээхтэрин кытары туруулаһан туста сылдьар ааттаах-суоллаах спортсменнары илэ көрөн умнуллубат өйдөбүллээх барыахтара.
Аан дойду Кубогын хаһаайына, Арассыыйа түһүлгэтин хас да төгүллэх призера, эһиил Таджикистан аатыттан Азия уонна Олимпиадаҕа сүүмэрдиир түһүлгэлэргэ тустар көҥүл ылбыт Виктор Рассадин уонна биир дойдулаахпыт, билигин Македония аатыттан аан дойду улахан түһүлгэлэрин арҕара сылдьар, Европа былырыҥҥы чөмпүйүөнэ Владимир Егоров оҕолорго бэйэлэрин куоһур албастарын көрдөрдүлэр.
Олег ЕГОРОВ.