Гражданскай сэрии геройа А.Е. Кралин аатынан Абаҕа орто оскуолатыгар үүнэр көлүөнэни патриотическай иитиигэ араас тэрээһиннэр ыытыллаллар. Быйыл улууспутугар Ийэ дойдуга бэриниилээх уонна историческай нэһилиэстибэ сылынан манна туһуланан үөрэнээччилэр элбэх аахсыйаларга кытталлар.
“Бу күннэргэ биһиги оскуолабыт оҕолоро «Блиндаж чумэчитэ» диэн өрөспүүбүлүкэ үрдүнэн биллэриллибит акцияҕа кытыннылар. Анал байыаннай дьайыыга кытта сылдьар саллааттарга анаан 194 чумэчи оҥорон биэрдилэр. Бу чүмэчи 8 чаас устата умайар эбит.
Ону сэргэ инники кирбиигэ сылдьар саллааттарга баҕа санааларын тиһэн суруктары суруйдулар. Бу суруктар саллааттарга олус күндүлэрин оҕолор үчүгэйдик өйдөөн, кинилэр санааларын өрө көтөҕөр, кыайыыга сирдиир, этэҥҥэ эргиллэн кэлэллэригэр баҕалаах баҕа санааларын сурукка тистилэр. Оскуолабытыгар анал байыаннай дьайыыттан бааһыран кэлэ сылдьар оскуолабыт выпускнигын кытта истиҥ көрсүһүү буолла. Биир дойдулаахпыт саллаат күннээҕи олоҕун-дьаһаҕын туһунан кэпсээтэ, оҕолор элбэх ыйытыыларыгар хоруйдаата. Оҕолор киниэхэ этэҥҥэ түргэнник эргиллэн кэлээриҥ диэн баҕа санааларын эттилэр.
Итини сэргэ “Мин гражданиммын» диэн нэдиэлэ чэрчитинэн «Мин — төрөөбүт нэһилиэгим инникитэ буолабын» диэн бэрт интэриэһинэй тэрээһин буолла. Манна нэһилиэкпит саҥа талыллыбыт баһылыга Максим Владимирович Семенов кэлэн, улахан кылаас оҕолорун кытта көрүстэ. Кини нэһилиэкпит баай историятын сырдатта, инники былааннарын билиһиннэрдэ”, — диэн оскуола бибилэтиэкэрэ Надежда Яковлева сырдатта.
“Амма олоҕо” хаһыат
