Саха Өрөспүүбүлүкэтин Ил Дархана Айсен Николаев Ил Түмэн Судаарыстыбаннай Мунньахха этиитигэр кэлэр 2024 сылы Оҕо аймах сылынан биллэрдэ. Сыл түмүктэрин таһаарар улахан мунньахха Амма улууһуттан оройуон дьокутааттарын Сэбиэтин бэрэссэдээтэлэ Владимир Колосов кыттыыны ылла.
Владимир Владимирович өрөспүүбүлүкэ салалтата анал байыаннай дьайыыга улахан болҕомто уурарын уонна Кыайыыны аҕалсыыга Сахабыт сирин бары олохтоохторо күүс-көмө буолалларыгар махталын биллэрбитин киэн тутта иһиттэ. Маны таһынан экономика сайдыытын көрдөрүүтэ пандемия кэнниттэн чөлүгэр түһэн, дойду үрдүнэн биир үрдүк кэрдиискэ турарын элбэх социальнай объектар, аҥардас быйыл 14 оскуола тутуллан олоххо киирбитэ үрдүк көрдөрүү буоларын бэлиэтиир. Ол иһигэр биһиги улууспутугар Абаҕа оскуола-сад тутуута буоларын астына этэр.
— Суол-иис тупсарыгар үлэлэри ыытарга күүтүүлээх Аммабыт суола 2024 сылтан оҥоһулларын тоһоҕолоон эппитин үөрэ иһиттим. Маны сэргэ Дьокуускай куоракка киинэ устар толору цикллаах павильон тутулларын астына иһиттим. Амма улууһуттан биллэр киинэ устар дьоммут ситиһиилэрэ, чуолаан режиссердар Дмитрий Давыдов уонна Степан Бурнашев саха киинэтин сайдыытыгар тус кылааттара олук буолбута саарбахтаммат.
Айсен Сергеевич 2024 сылы Оҕо аймах сылынан биллэрдэ. Саха сирин үрдүнэн оҕо төрөөһүнэ элбэҕин бэлиэтээтэ. “Үйэ оҕото” ийэ хапытаала биэс сылга уһаабытын, суумата 110 тыһ. солк., онтон “Дьиэ кэргэн” өрөспүүбүлүкэтээҕи Ийэ хапытаала 300 000 солк. буоларын сэргии иһиттибит. Маны таһынан Пушкинскай карта аналогиятынан, 7 сааһыттан 14-гэр диэри оҕолорго “Саха сирин олохтооҕо” картаны биэриэхпит диэн этиитин биһирээтим, — диэн Владимир Владимирович быһа эпиир кэнниттэн тута санаатын үллэһиннэ.
Вера ИВАНОВА.