Бүгүн кулун тутар 2 күнүгэр академик Л.В. Киренскэй аатынан Амма лиссиэйин үбүлүөйдээх 30 сылын бэлиэтиир. Лиссиэй Амма улууһугар эрэ буолбакка, Саха сиригэр үрдүк көрдөрүүлээх биир бастыҥ оскуола буолар.
Ааспыт 30 сыл устата оскуоланы 958 выпускник, олор истэригэр 47 кыһыл көмүс, 73 үрүҥ көмүс мэтээлинэн ситиһиилээхтик бүтэрбит оҕолор дойдубут араас муннугар үлэлии-хамсыы, айа-тута сылдьаллар. Аныгы кэмҥэ олоҕу кытта тэҥҥэ хардыылыыр, ураты көрүүлээх, сайдыылаах, патриоттуу өйдөөх-санаалаах оҕолору иитэн-үөрэтэн таһаарыы – оскуола сүрүн сыала-соруга буолар. Бэс ыйын 15 күнүгэр 1993 сыллаахха Саха республикатын үөрэҕин министерствотын 01-06/534 № Ыйааҕынан Амма педагогическай гимназията арыллыбыта. Маҥнайгы дириэктэринэн Анатолий Петрович Колодезников анаммыта.Бу кэмтэн гимназия сүнньүттэн үөрэх хайысхатын уларытан, оскуола иһинэн научнай-методическай сэбиэт үлэтин саҕалаабыта, дириэктэри научнай үлэҕэ солбуйааччы баар буолбута. 1997 сылтан маҥнайгы Президеммит Михаил Николаев Уурааҕынан Амма гимназията СӨ Бэрэсидьиэнин оскуолаларын ситимигэр киирбитэ. Өрөспүүбүлүкэ бастыҥ оскуолаларын кытта бииргэ үлэлиир кыахтаммыта. Оскуола үлэтин түмүгүнэн 1996, 1997, 2002, 2003, 2015 сылларга Бүтүн Арассыыйатааҕы “Сыл бастыҥ оскуолата” күрэххэ Лауреат аатын ылары ситиспитэ. 2000 сыллар саҕаланыыларыгар профильнай үөрэхтээһиҥҥэ өрөспүүбүлүкэҕэ пилотнай оскуола буолан, аныгы ФГҮӨС барылын оҥорсубуттара. 2009 сылтан гимназия академик Л.В. Киренскэй аатын сүгэр. 2013 сылтан “Лицейскэй үөрэхтээһин концепциятын” көмүскээн, техническэй предметтери дириҥэтэн үөрэтэр лиссиэй буолла. Ол кэмҥэ “Саха республикатыгар инженернэй үөрэхтээһини сайыннарар оскуола технопаркалара” диэн 4 пилотнай оскуола ахсааныгар киирсэн, “Олоҥхоттон сулустарга” диэн оскуола технопарката арылынна. 2015 сылтан ЭВМ оператордарын бэлэмниир профессиональнай үөрэхтээһин киирдэ. Профориентационнай үлэҕэ Хотугулуу-Илиҥҥи Федеральнай университеты, Ирбэт тоҥу чинчийэр, Физтех Хотугу проблемалары чинчийэр институттары, Роскосмоһы (“Восточнай” космодрому), “Якутуголь” тэрилтэни, Москватааҕы физико-техническэй институты кытта, А.И. Чомчоев “Тымныыны тургутар полигонун” о.д. а тэрилтэлэри кытта ыкса үлэлиири ситистэ. 2013 сылтан «Сулус» диэн байыаннай-патриотическай кулууп үлэтин саҕалаата. 2019 сыллаахха лицейгэ Советскай Союз икки төгүллээх Геройа, ССРС летчик-космонаба В.Ф. Быковскай аатынан юнамерскай этэрээт тэрилиннэ. Этэрээт «Бастакы эскадрилья» диэн Салгын Космическай Күүстэрин Киинин офицерскай кулууптарын юнармейскай киинин чилиэнэ. Этэрээккэ билигин 165 юнармеец баар. Билигин тус суолларын-иистэрин булбут, Саха сиригэр эрэ буолбакка, Бүтүн Россия, Аан дойду таһымыгар тахсыбыт выпускниктарбытынан киэн туттабыт. Ол курдук Саха сиригэр киноиндустрия эйгэтин сайыннара сылдьар, элбэх фестиваллар кыайыылаахтара, режиссер Дмитрий Давыдов, кинооператор Семен Аманатов, звукорежиссер Иннокентий Сивцев, экология миниистирэ Евгений Перфильев, Бүтүн Арассыыйатааҕы “Сыл бастыҥ учуутала-2014 “ күрэх финалиһа Ирина (Кот) Бочкарева, ”Сыл бастыҥ учуутала-2018” өрөспүүбүлүкэтээҕи күрэх кыайыылааҕа Анна (Адамова) Платонова, Суворун Омоллоон аатынан Опера, балет театрын солистката Екатерина Захарова, учуонайдар, педагогика билимин кандидата Владлен Кугунуров, уйулҕа билимин кандидата Евдокия Неустроева, география билимин доктора Станислав Ксенофонтов, экономика билимин кандидата Ольга Парфенова, техническэй билим кандидата Прокопий Филиппов уо.д.а лиссиэй киэн туттар үөрэнээччилэрэ. Лицейбитигэр 9 выпускник-учууталлар таһаарыылаахтык үлэлии сылдьаллар.
Күн бүгүн лицейгэ 384 оҕо 22 класс-кэмпилиэгинэн үөрэнэр. Информационно-технологическай, естественно-научнай, социально-гуманитарнай хайысхалаах кылаастардаах. Түгэнинэн туһанан, күндү оҕолорбутун, төрөппүттэрбитин, оскуолабыт выпускниктарын уонна учууталларбытын лиссиэйбит 30 сылын туолар өрөгөйдөөх үбүлүөйүнэн үөрэн-көтөн, долгуйан туран эҕэрдэлиибин. Бары үөрэнээччилэригэр туйгун үөрэҕи, кынаттаах ситиһиилэри, кыайыылары, төрөппүттэргэ, учууталларга тулууру, дьулууру, оттон бу 30 сыл устата олох кэтит аартыгар кынат анньыммыт выпускниктарбар мэлдьи оскуолаҕыт, улуускут, дойдугут аатын үрдүктүк тутан, аар-саарга аатырда тураргытыгар баҕарабын.
Дария ЗАХАРОВА, Академик Л.В. Киренскэй аатынан Амма лиссиэйин дириэктэрэ, РФ уопсай үөрэхтээһинин Бочуоттаах үлэһитэ, СӨ үтүөлээх учуутала, педагогическай наука кандидата.
Лиссиэй туһунан сиһилии “Амма олоҕо” хаһыат кулун тутар 15 күнүнээҕи нүөмэригэр билсээрин.