Олунньу ый бүтэһик күнүгэр Дойдубут Бэрэсидьиэнэ Владимир Путин Федеральнай Мунньахха сыллата оҥорор Анал Туһаайыытын оҥордо. Бу Туһаайыы урукку атын Туһаайыылартан ураты буолла. Ол курдук Дойду салайааччыта биир-икки сылга буолбакка, алта сыл устата, ол эбэтэр 2030 сылга диэри хайдах сайдыахтаахпытын, ол инниттэн ханнык суол хайысханан үлэ-хамнас барыахтааҕын бэрт чопчу бэлиэтээтэ. Туһаайыыны дьон-сэргэ барыта да сэргии көрбүтүн бэлиэтииллэр. Кинилэртэн биирдэстэрэ Н.Е. Иванов аатынан Бөтүҥ орто оскуолатын дириэктэрэ, СӨ Үөрэҕириитин туйгуна Акулина Иванова буолар.
“Биһиги бары кэлэктиибинэн Аҕа баһылык Туһаайыытын иһиттибит уонна олус сэргээтибит. Тоҕо диэтэр Владимир Владимирович сүрдээх дьоһуннаах этиилэри эттэ, соруктары туруорда. Онтон мин тус бэйэм салайааччы буоларым быһыытынан “Кадр” диэн национальнай бырайыак баар буоларын сэргээтим. Бу кадр боппуруоһун быһаарыыга хайаатар да көмөлөөх буолуо дии саныыбын. Аны “Семья” диэн национальнай бырайыак үлэлиэхтээх. Ол биллэн туран дьиэ кэргэн туруктаах буолуутугар тирэх буолуо, киниэхэ оҥоһуллар көмөлөр, бырагыраамалар тыа сирин олоҕо-дьаһаҕа сайдыытыгар көмөлөһүөхтэрэ. Аны үөрэх эйгэтин үлэһиттэрэ буоларбытынан кылаас салайааччыларыгар, дириэктэр сүбэһиттэригэр эбии көмө харчы бэриллэр буолбутун астына иһиттибит. Чахчы да билигин кинилэр үлэлэрэ олус эппиэтинэстээх буолла, оҕону иитиигэ суолталара улаатта. Онон хайаатар да ити хамнастарыгар эбиллии оҥоһуллара саамай сөп”, — диэн Акулина Семеновна санаатын үллэһиннэ.
“Амма олоҕо” хаһыат
