1993 сыл балаҕан ыйын 2 күнүгэр СӨ бастакы бэрэсидьиэнэ Михаил Николаев Ийэ күнүн бэлиэтээһин туһунан 532 нүөмэрдээх Ыйааҕы таһаарбыта. Бу кэмтэн ылата быйыл номнуо 30-с сылын алтынньы үһүс өрөбүлүгэр Саха сирин ийэлэрин чиэстиибит. Элбэх бырааһынньыктар ортолоругар ийэ күнэ ураты миэстэни ылара — бу Ийэҕэ ытыктабыл, махтал, таптал бэлиэлэрэ буолар. Алтаммытыгар бу бэлиэ күнү көрсө «Иэйии» култуура киинин үлэһиттэрэ «Дьүөгэлэрдии истиҥник» ийэлэргэ аналлаах сынньалаҥ киэһэни тэрийдилэр.
Бэрт сэргэх тэрээһин бырагырааматыгар итии чэйдээх, ийэ сылаас илиитинэн бэлэмнэниллибит минньигэс астаах остуол тула олорон кэрэ сэбэрэ, хаһаайка кистэлэҥнэрин уо.д.а. туһунан истиҥ кэпсэтии, санаа атастаһыы, кинигэ уонна маастар кылаас нөҥүө билиини хаҥатыы, оонньуу-көр киирдилэр. Тэрээһин чэрчитинэн олохтоох бибилэтиэкэ салайааччыта Алена Захарова ийэлэргэ аналлаах кинигэлэрин быыстапкатын көрдүбүт.
Култуура киинин оформителэ, уран тарбахтаах Айталина Дьячковская харысхал куукулатын оҥорууга маастар-кылааһыгар астына-дуоһуйа үөрэннибит. Сэмэй бириистэрдээх оонньууларга кыттан ким сатабыллааҕын быһаарыстыбыт. Алтан нэһилиэгин дьаһалтатыгар баһылык солбуйааччытынан үлэлээбит, билигин СӨ ыччат уонна социальнай коммуникация Министиэристибэтин гражданскай уопсастыбаны кытта үлэҕэ салаатын кылаабынай исписсэлииһэ Сардаана Верховская ыалдьыттаан, тэҥҥэ сылдьыһан, санаа үллэстэн ааста. Ийэлэр күннээҕи түбүктэриттэн быыс-арыт булан мустаннар, чахчы да дьүөгэлэрдии истиҥник сэлэһэн, санааларын үллэстэн, көрү-нары көҕүлүттэн тутан, үҥкүүлээн битийэн сэргэхсийэн тарҕастылар, үлэ нэдиэлэтин түмүк күнүн туһалаахтык атаардылар. Бу истиҥ көрсүһүүнү тэрийбит «Иэйии» киин үлэһиттэригэр махталларын биллэрдилэр.
Татьяна АТЛАСОВА