Алтан нэһилиэгин 58 нүөмэрдээх учаастактааҕы быыбардыыр хамыыһыйата «Иэйии» култуура киинигэр үлэлии олорор. Дойдубут бэрэсидьиэнин талыы быыбарыгар бүгүҥҥү сонун көстүүнэн орто оскуола иккис кылааһын оҕолоро кылаастарын салайааччыта Варвара Васильевна Дьяконованы кытары кэлсэн быыбар диэн тугун-ханныгын билистилэр.
Учууталлара батыһыннара сылдьан Арассыыйа гражданина буолары туоһулуур докумуонтан саҕалаан быыбар испииһэгэр илии баттыыры, бүлүтүөнү ылан дьон хараҕыттан хаххалыыр хабыынаҕа киирэн куоластыыры сиһилии кэпсээтэ. Кырачааннар сүрдээҕин интэриэһиргээтилэр, сокуоннай саастарын туоллахтарына хайаан да ытык иэстэрин толорон быыбардыы кэлэллэрин эрэннэрдилэр.
Өссө биир кэрэ көстүүнэн нэһилиэк аҕа саастаахтарын түмсүүтэ сахалыы сайбаччы таҥнан кэлэн үөрэ-көтө куоластааһыннара буолар. Ол курдук, саха төрүт таҥаһын 2000 сыллар саҕаланыыларыттан киэҥ эйгэҕэ көҕүлүү, тарҕата сылдьар, Олоҥхо ыһыахтарын кыайыылаахтара, нэһилиэкпит Далбардара уонна кинилэри арыаллыы сылдьар Эр Хоһуун бэрэссэдээтэл Марина Лыткина салалтатынан бэртээхэй көстүүнү бэлэхтээтилэр. Быыбарбыт бастакы күнэ чахчы уруккулуу бырааһынньык кэриэтэ ааста.
Татьяна Атласова.