Амма бильярдистара быйылгы сезоннарын түмүктүүр турнирдарыгар көрүстүлэр

Амма нэһилиэгин “Фаворит” бильярдыыр кулуубугар улуус бильярды сөбүлээччилэрэ мустаннар быйылгы сезону түмүктээтилэр. Турнирга биэс нэһилиэктэн кэлэн үс бөлөххө арахсан оонньоотулар. Сарсыардаттан саҕалаан баран түүннэри оонньоон, үүнэр күн сарсыардатыгар, 3  чааска кыайыылаахтары быһааран, астына оонньоон, “аны күһүн көрсүөххэ” диэри дэһэн тарҕастылар.


“Фаворит”  бильярдыыр кулууп салайааччыта Григорий Аммосов иһитиннэрбитинэн, сезону түмүктүүр турнирга   31 киһи үс бөлөххө арахсан оонньоотулар. Ол курдук кэрэ аҥардар бу сырыыга эр дьону кытта тэҥҥэ  буолбакка, бэйэлэрэ туспа бөлөх буолан, сэттиэ буолан бастыҥы быһаарыстылар. Итини сэргэ эдэрдэр уонна бэтэрээннэр кииристилэр. Турнирга Амматтан,  Эмистэн, Сатаҕайтан, Алтантан, Болугуртан кэллилэр. Кытааччылар кэрэ аҥардар «свободнай пирамида» , эдэрдэр (50 саастарыгар диэри) уонна бэтэрээннэр «омская пирамида» көрүҥнэринэн кииристилэр.

Тыҥааһыннаах, эрийсиилээх киирсиилэр түмүктэринэн эдэрдэргэ бастакы миэстэни Амматтан Сандал Кожуров, иккис миэстэни Эмистэн Мичил Новиков уонна үһүс миэстэни Алтантан Антуан Харлампьев ыланнар харчынан бириистэри туттулар.

Онтон кэрэ аҥардарга кыайыылааҕынан Сатаҕайтан Дария Стручкова таҕыста. Иккис миэстэ Амматтан Аграфена Трифонова, үһүс миэстэ Эмистэн Галина Куприянова буоллулар. Манна даҕатан эттэххэ, кинилэр оонньуулара сарсыарда 10 чаастан саҕаланан баран, киэһэ 9 чааска түмүктэннэ. Бириистээх миэстэлээхтэр дьиэҕэ-уокка туһалаах сыаналаах бириистэри туттулар, мэтээл кэттилэр, диплому ыллылар. Манна даҕатан эттэххэ, бильярды сэҥээрэр кэрэ аҥардар бэйэлэрэ бөлөх тэринэн тураллар.

Дьэ онтон саамай элбэх кыттааччылаах бэтэрээннэр бөлөхтөрүгэр бастакы миэстэни улуус баһылыгын Кубогын кыайыылааҕа Болугуртан Савва Антипин ылан, өссө төгүл күүстээх оонньооччутун көрдөрдө. Иккис миэстэни Эмистэн Максим Чемезов ылан Амма бильярдын спордугар саҥа аат таҕыста.  Үһүс миэстэни Сатаҕайтан Афанасий Неустроев, Амматтан Константин Слепцов ыллылар.

“Сайын дьон-сэргэ сынньанар, сир астыыр,  элбэх ыалдьыт кэлэр буолан дьоммут соло буолбаттарынан, киһи соччо-бачча мустубатынан бу кэмҥэ кулууппут сабыллар. Онон аны күһүн алтынньы саҥатыгар аһыллыахпыт. Уопсайа сезон устата 11 улахан  күрэхтэһии буолбута. Ону таһынан коммерческай оонньуулар ыытыллыбыттара. Икки  биирдиилээн бастыыр иһин,  биир пааранан уонна биир хамаанданан. Бу сылы түмүктүүр 16-с күрэхпит буолла. 2023-24 сыл сезонун түмүктүүр турнирга түмүктэр таҕыстылар.

 

Ол курдук бильярдыыр кулууппут кылаабынай судьуйатыгар Игнат Иванович Гаврильевка, кулууп эҥкилэ суох үлэлиир администраторыгар Михаил Ильич Неустроевка 5000 солк “Нужные вещи” маҕаһыынтан сэртипиктээттэри туттардым. Ону таһынан күрэхтэргэ элбэхтик миэстэлэспит эдэрдэргэ Амматтан Валерий Кириллиҥҥа, бэтэрээннэргэ  Константин Максимовка 3000 солкуобайдаах, 57 төгүл  дьарыкка сылдьыбыт эдэр оонньооччу Сандал Кожуровы, бэтэрээннэргэ 78 төгүл кэлэн дьарыктаммыт Роман Шиловы  2000 солкуобай суумалаах сэртипикээттэринэн бэлиэтээтим. Онтон кэрэ  аҥардартан элбэх күрэхтэргэ кыттан миэстэлэспит Эмистэн Галина Куприяноваҕа 3000 солкуобайдаах бириэмийэ туттарылынна. Ити курдук түмүктүүр сезоммут турнира бэрт үчүгэйдик ааһан, бары кыттааччылар астынан, “сайын устата үчүгэйдик сынньанан, аны күһүн көрсүөххэ диэри” диэри дэһэн астынан дьиэлэригэр айаннаатылар”, — диэн кулууп салайааччыта Григорий Григорьевич сырдатта.

“Амма олоҕо” хаһыат

Читайте дальше