Амма нэһилиэгэр «Олоҥхо» эргиэн киинигэр улуус дуобаччыттара мустан быйылгы сезоннарын арыйар күрэхтэһиилэрин ыыттылар.
Амма улууһа урут уруккаттан дуобат сайдыбыт сирэ. Дуобат киинэ биһиги улууспутугар суох буолан дуобаты сөбүлээччилэр кыра бөлөхтөрүнэн ханна миэстэ көстөрүнэн күрэхтэри ыытан 15 сыл курдук оонньоон кэллибит. Билигин иккис сылбытын барыларын бииргэ мунньан дуобаты, саахыматы сөбүлээччилэр мустан дьарыктанабыт, күрэхтэри ыытабыт. Ол курдук «Олоҥхо» эргиэн киинигэр администратор Марианна Филатова хос биэрэн сезону арыйар күрэхтэһии ыытылынна. Маны сэргэ садуоба күрэх уонна кэлэр сыллааҕы былаан саахымат дуобат федерациятын чилиэннэрэ кыттыылаах ылылынна. Саахымакка, дуобакка улуус иһинэн иккилии күрэхтэри улуус спортивнай күрэхтэрин былаанын иһинэн киллэртэрии, саас ыытыллыбыт өрөспүүбүлүкэтээҕи күрэххэ 1 киһи спорт маастарыгар кандидат, 4 дуобатчыт 2 спортивнай разрядтары толорбут дьон докумуоннарын эккирэтиһэн ылыы, кэлэр сылга квалификацияны өссө үрдэтии, үбүлүөйдээх саастаах дьоммут бириистэригэр күрэхтэри ыытыы, оонньуур хоспут кэҥиирин туруорсуу, остуол, олоппос эбии булуу, нэдиэлэ аайы көрүҥүн уларыта сылдьан саахымакка, дуобакка, садуоба, садуоук, садуоукба дьарыктаныы, күрэхтэргэ кыттыы, оскуолаҕа дуобаты, саахыматы ыытар учууталлары кытта шефтэһии, маастардары, гроссмейстэрдэри ыҥыран маастар кылаастары ыыттаран кылааһы үрдэтии, улуус дуобатчыттарын туһунан кинигэни таһаарыы курдук этиилэр былааҥҥа киирдилэр.
Күрэх судьуйатынан Мария Григорьева үлэлээтэ. Түмүк маннык буолла.
Эр дьоҥҥо:
1 миэстэ Алексей Неустроев.
2 миэстэ Кирилл Старостин.
3 миэстэ Николай Алексеев.
Үс көрүҥҥэ 9 тур түмүгүнэн дуобакка Егор Чемезов 7,5, саахымакка Петр Аммосов -8, баарыска Кирилл Старостин -13 очколаах муҥутуур кыайыылаах аатын ыллылар.
Бэтэрээн дьахталларга:
1 миэстэ Тамара Иванова.
2 миэстэ Матрена Федорова.
3 миэстэ Надежда Неустроева.
Эдэрдэргэ:
1 миэстэ Мария Григорьева.
2 миэстэ Лариса Никифорова.
3 миэстэ Елена Попова.
Кулууп активын чилиэннэригэр Михаил Степановка, Иван Бураевка, Мария Григорьеваҕа, Кирилл Старостиҥҥа махталбын тиэрдэбин. Иннибитигэр өссө да элбэх былааннар тураллар.
Лариса Никифорова -Баһылай кыыһа, СӨ культуратын туйгуна, “Өй оонньуута” кулууп салайааччыта,
«Үһүс көлүөнэ оскуолатын» волонтера.