Олунньу 18-21 күннэригэр Дьокуускай куоракка «Эдэр профессионаллар» профессиональнай маастарыстыба чемпионатын региональнай түһүмэҕэ буолан ааспытыгар Амматааҕы лиссиэй үөрэнээччилэрэ үрдүк ситиһиилээх кэллилэр.
Амма улууһугар кыайан, түмүк түһүмэххэ киирэр талар сүүмэрдээһини ааһан,13 хамаандаттан 5 иһигэр киирэн, лиссиэйтэн Портнягин Толя, Новиков Руслан «Сетевое и системное администрирование» (юниоры) компетенция түмүктүүр түһүмэҕэр ситиһиилээхтик кыттан кэллилэр. 4 күннээх тыҥааһыннаах күрэх түмүгүнэн кыайыылаах аатын сүгэн, 1 миэстэни ыллылар. Уолаттар иккиэн 8 кылааска үөрэнэллэр. Кинилэри кыра эрдэхтэриттэн информатика учуутала Иванов Василий Дмитриевич дьарыктыыр. Толялаах Руслан аны сотору кэминэн Уһук Илиҥҥэ өрөспүүбүлүкэ чиэһин көмүскүү барыахтара.
Наталия Рязанская.