Чурапчыга ССРС үтүөлээх маастара Василий Николаевич Гоголев бирииһигэр көҥүл тустууга күрэхтэһии буолла. Бу түһүлгэ эһиил буолуохтаах “Азия оҕолоро” норуоттар икки ардыларынааҕы спортивнай оонньууларга Саха сирин хамаандатын сүүмэрдиир соруктаах.
Күрэхтэһии түмүгүнэн бастакы икки бириистээх миэстэлэри ылбыт эдэр бөҕөстөр өрөспүүбүлүкэ хамаандатыгар киирэр кыах ылан, салгыы сүүмэрдиир күрэхтэргэ кыттыахтара диэн эрдэ этиллэн, күөнтэһии күүстээх буолла. Барыта холбоон 290 спортсмен күөн көрүстэ. Амматааҕы Оҕо спортивнай оскуолатын тустууга тириэньэрдэрэ Афанасий Адамов уонна Михаил Неустроев сэттэ бөҕөстөөх тиийэн күрэхтэстилэр. Эрийсиилээх киирсии түмүгүнэн 68 киилэҕэ Егор Жирков уонна 75 киилэҕэ Дамир Капитонов үһүс миэстэҕэ тигистилэр.
Онтон Максим Андросов 44 киилэҕэ кыһыл көмүс мэтээли ылла. Максим бу түһүлгэҕэ биэс бөҕөһү хотто. Финалга Нам уолун чахчы кыахтаахтык, 10:0 ахсаанына тута баһыйа кыайда. Тириэньэрэ Афанасий Адамов этэринэн, Максим салгыы сүүмэрдэнэр хамаандаҕа киирэр кыахтаах кандидат быһыытынан дьарыга салҕаныаҕа.
«Уолбут салгыы Олимпийскай Эрэл училищатыгар эрчиллэн, Казахстаҥҥа, Киргизияҕа сүүмэрдиир улахан күрэхтэргэ күүһүн холоһон көрүөҕэ. “Азия оҕолоругар” күрэхтэһэр хамаанда састааба аны саас биирдэ биллэр. Атын да бөҕөстөрбүт греко-римскэйгэ да, хапсаҕайга даҕаны хапсан хаалыахтарын сөп. Кэм, түһүлгэ көрдөрөн иһиэҕэ». — диэн этэр тириэнньэр.
Олег ЕГОРОВ