Ил Дархаммыт быйыл үлэ сылын биллэрбитинэн үлэни өрө туппут дьоммут тустарынан дьоҥҥо-сэргэҕэ, ордук билиҥҥи ыччакка билиһиннэрэргэ киэҥ ис хоһооннордоох үлэлэр ыытыллаллар, ол чэрчитинэн Горнай улууһун Мытаах түмэлигэр Академик-худуоһунньук А.Н. Осипов хартыыннай галереятын саалатыгар Амма улууһун Сулҕаччы нэһилиэгин бочуоттаах олохтооҕо,”Амма улууһун киэн туттуута”, «Амма улууһун Уран ууһа», бэлиэлэрдээх, ЮНЕСКА худуоһунньуктарын кыһыл көмүс мэтээлинэн наҕараадаламмыт, Россиятааҕы, Аан дойдутааҕы элбэх быыстапкалар кыттыылааҕа, оҕо эрдэҕиттэн уруһуйга талааннаах, кэлин айылҕаттан бэриллибит дьоҕурун сайыннарыыга күүстээх санаатын, дьүккүөрдээх үлэтин ууран үлэлэһэн норуот таптыыр худуоһунньуга буола үүммүт Николай Николаевич Рязанскай 40 – тан тахса хартыынатын быыстапкатын икки күн туруоран олохтоохторго билиһиннэрдэ.
Уруһуйдарга бааллар: оскуолаҕа худуоһунньугу чиҥ билиигэ үөрэппит, дуоспурннаахтык туттан турар бэтэрээн учууталлар, норуот тапталлаах ырыаһыта Христофор Максимов оҕо эрдэҕинээҕи мэник, сытыы мэтириэтэ, дууһабытыгар ойуулаан көрөр Чөчүөккэбит хамсаан кэлиэх курдук уруһуйдаммытын сөҕө көрдүбүт, худуоһунньук хас биирдии хартыынатын көрөөччүгэ сиһилии кэпсээтэ, быыстапканы көрө кэлбиттэр уруһуй кэрэ эйгэтигэр киирэн таҕыстыбыт, кэскиллэрбит, кэнчээри ыччаттарбыт уһуйаан иитиллээчилэрэ, оскуола үөрэнээччилэрэ хото сылдьан быыстапканы көрбүттэрэ киһини үөрдэр.
Быыстапканы көрүү түмүктүүр кэмигэр Н.Н. Рязанскай ааспыт кэмнэргэ бөдөҥ норуодунай суруйааччылары, урукку Сойууска киэҥник биллибит Академик, худуоһунньугу көччөх курдук кынаттаан чыпчаалларга таһаарбыт Мытаах нэһилиэгин дьоно-сэргэтэ искусствоҕа, литератураҕа олус чугастарын бэлиэтээн туран кини хартыынатын быыстапкатын элбэх киһи сэҥээрэ көрбүтүн ойуччу бэлиэтээн туран, былааннаммыт тэрээһин ситиһиилээхтик барбытыгар олохтоох түмэл үлэһиттэрэ күүс көмө, өйөбүл буолбуттарыгар махталын биллэрдэ.
Норуоттан тахсыбыт худуоһунньукпут киистэннэн тахсыбыт үлэлэриҥ өссө үрдүк чыпчаалларга дабайа турдуннар диэн алгыс тылбытын этэбит.
Н.Н. Осипов РФ суруналыыстарын сойууһун чилиэнэ, “ҮК” общественнай корреспондена.