Амма лиссиэйин хамаандата Дьокуускай куоракка ыытыллыбыт Карл Поппер форматынан дебакка «Сократ» кулууп турнирыгар кытынна. Бу күрэххэ оҕолор улахан дьону кытта тэҥинэн кииристилэр.
Түмүккэ Карамзин Ян, Макарова Рита, Шестаков Женя састааптаах лиссиэй хамаандата кыайыылаах аатын сүгэн, маҥнайгы миэстэ буолары ситистилэр.
Иккис күҥҥэ, кулун тутар 10 күнүгэр, «Эдэр профессионаллар -2024» күрэххэ кыттан, 15 хамаандаттан бочуоттаах 2 миэстэҕэ таҕыстылар. Өрөспүүбүлүкэ араас улуустарыттан барыта бэйэлэрин этаптарыгар кыайыылаах хамаандалар кэлэн күөн көрүстүлэр. Чемпионат 2 модулунан барда: 1 модуль — араатардар искусстволара , 2 модуль — оскуола дебата. Чемпионат түмүгүнэн лиссиэй хамаандатын 3 спикерэ үһүөн «Топ лучших спикеров» киирэн, өрөспүүбүлүкэ бастыҥ дебатчыттарын ахсааныгар киирдилэр. Хамаанда чилиэттэрэ уонна кинилэр салайааччылара-тренердэрэ Наталья Сивцева, Татьяна Петрова күрэххэ кытта баралларыгар күүс-көмө буолбут дьонноругар, Амма улууһун социальнай боппуруоска баһылык солбуйааччытыгар Нюргуяна Ивановна Илларионоваҕа, лиссиэй директорыгар Дария Иннокентьевна Захароваҕа уонна лицей выпускниктарыгар Кугунуров Владилен Васильевичка, Давыдов Дмитрий Леонидовичка, Аманатов Семен Александровичка махтал тылларын тиэрдэллэр.
Наталия Рязанская.