Аҕа дьиэ кэргэҥҥэ суолтатын, оҕо иитиитигэр сүрүн оруолу сүгэрин оҕоҕо өйдөтөр сыаллаах Үлэ Геройа П.И.Яковлев аатынан Амма Наахара орто оскуолатыгар «Аҕа күннэрэ» тэриллэн ыытылыннылар. Бу күннэргэ аҕалар үөрэх кыһатыгар түмсэн араас тэрээһиннэргэ кытыннылар.
Эдэр ыччат лидера Мичил Ефремов, физкультура учууталлара Михаил Романов, Иван Пахомов көҕүлээһиннэринэн 5-11 кылаас уолаттара аҕаларын кытта волейбол күрэҕэр кытыннылар. Тыҥааһыннаах күрэххэ Мирослав Романов «Виктория» хамаандата бастакы, Любомир Трофимов «Флеш» хамаандата иккис, Спартак Макаров «Спартак» хамаандата үһүс, Леонид Александров хамаандата төрдүс миэстэ буолары ситистилэр. Бэлиэ күнү көрсө «Люблю папу» хаартыска быыстапката оскуола сынньанар муннугар аһыллан элбэх оҕо, төрөппүт болҕомтотун ылыаҕын ылла. Манна «Один в один» диэн бэрт интэриэһинэй күрэххэ Алгыстаана Михайлова бастакы, Семён Александров иккис, Спартак Макаров үһүс буоллулар. «С папой классно» күрэххэ Слава Никифоров бастакы, Дима Пахомов иккис, Аэлита Александрова, Күндүүнэ Степанова, Арина Александрова, Аяна Никифорова, Урсууна Гаврильева, Ньургустаана Гаврильева үһүс миэстэни ыллылар. «С папой на рыбалке» түһүмэххэ Мирослав Романов бастакы, Эрхаан уонна Дайаан Ефремовтар иккис, Сандал Устинов үһүс миэстэҕэ таҕыстылар. Барыта быыстапкаҕа 56 хаартыска турда.
Алын сүһүөхтэргэ ыччат лидера Мичил Ефремов, нэһилиэк спортивнай инструктара Мария Заборовская уонна физкультура учууталларын көҕүлээһиннэринэн «Для меня всегда герой-самый лучший папа мой» диэн көрдөөх старт күрэҕэ олус көхтөөхтүк ааста. Барыта 15 уол, 12 аҕа кытынна. Бастакы миэстэни Иван Пахомов «Белый тигр» хамаандата, иккис миэстэни Захар Александров «Чёрный тигр» хамаандата, үһүс миэстэҕэ «Спартак» хамаанда тахсан үөрдүлэр-көттүлэр. Кыһамньылаах аҕаларбыт «Отец. Отчество. Отечество» диэн кылаас чаастарын ыыттылар. Оскуолабыт биир көхтөөх аҕатынан бу сайынтан бэйэ дьыалатын арыммыт, нэһилиэги ыраас, фильтрдаммыт уунан хааччыйар Гаврил Александров буолар.
Гаврил Гаврильевич амарах санаатынан оскуола выпускной 4, 9, 11 кылаастарыгар, итиэннэ 1, 2, 6 кылаастарга ыраастаныллыбыт ууну балаҕан ыйыгар бэлэх ууммута. Үөрэнээччилэр махтал тыллара бэйэ дьыалалаах Гаврил Александровка ситиһиигэ эрэ кынаттаатын! Аҕа күнүнэн айхалламмыт алтынньы ый иллээх олоҕу, эйэлээх халлааны бэлэхтээтин. Сахабыт Саарына аҕабыт биһиэхэ иллээх дьиэ кэргэн, оҕо-уруу сайдар, үүнэр олуга буоларын умнумуоҕун.
Ирина КОРЯКИНА-ОЛЕСОВА