Кыһыҥҥы тымныыга нэһилиэк бары тэрилтэлэрэ саахал тахсыбатын, тахсар да түгэнигэр суһаллык туоратыыга бииргэ сомоҕолоһон үлэлииллэр.
Ол курдук олохтоох дьаһалта тэрилтэлэр сылаас — ичигэс буолалларын туһугар кыһыҥҥы тымныыларга тэрилтэлэргэ дьуһуурустуба олохтуур. Тымныы күннэргэ саамай тутаах дьоннорбутунан дьиэ-уот коммунальнай хаһаайыстыба үлэһиттэрэ буолаллар. Кыһаллан туран тоҥору — хатары умнар, сылаалаах үлэҕэ үлэлиир нэһилиэкпит хачыгаардара олохтоохтор махталларын ылаллар. Сахабыт сирин тымныыларын кытары сыраларын — сылбаларын биэрэн үлэлиир бу үлэ, мээнэ киһи санаммат ыарахан үлэтэ буоллаҕа. Амма Наахара нэһилиэгэр иккис сылын ОДьХ учаастактааҕы салайааччытынан сахалыы тобуллаҕас толкуйдаах Андрей Захаров таһаарыылаахтык үлэлиир.
«Амма Наахара учаастага 18 үлэһиттээх. Кырдьаҕас үлэһитим Александр Ефремов, СӨ олох-дьаһах коммунальнай хаһаайыстыбатын бэтэрээнэ буолар. Саамай эдэрбит 26 саастаах Лаврентий Васильев. Оскуола хочуолунайын оператор — машиниһа Юрий Никифоров 1998 сылтан саҕалаан саамай уһуннук үлэлээбит хачыгаарбыт буолар. Онтон электрик Евсей Никифоров 1990 сылтан үлэлиир, эмиэ СӨ олох-дьаһах коммунальнай хаһаайыстыбатын бэтэрээнэ. Биир уһуннук үлэлээбит хачыгаарынан Денис Находкин буолар. Биһиэхэ слесарь идэлээх Евгений Пахомов, сварщик үөрэхтээх Михаил Пахомов үрдүк таһаарыылаахтык үлэлиир исписэлиистэр. Үлэҕэ оскуола хочуолунайыгар таһырдьаттан бункер манупулятор нөҥүө үөһэттэн чох кутуллар. Онтон саҥа квартальнай хочуолунайга трактор куомсугар баһан чоҕу киллэрэр. Хачыгаардар 12-лии чаас үлэлииллэр, анал таҥаһынан хааччыллаллар. Икки хочуолунайынан 6-лыы киһи 3 симиэнэҕэ тураллар. Күҥҥэ икки хочуолунай ортотунан 16-17 туонна чоҕу оттор. Нэһилиэкпитигэр итиинэн хааччыллар 7 социальнай эбийиэк, 9 уопсай дьиэ уонна 70-тан тахса чааһынай дьиэ баар»,- диэн салайааччы сырдатар.
Маннык элбэх күүһү-уоҕу, тулууру-дьулууру эрэйэр үлэҕэ биһиги хачыгаар уолаттарбыт Юрий Никифоров, Василий Артемьев, Манчаары Макаров, Ким Макаров, Илья Пахомов, Иван Пахомов, Семен Васильев, Александр Ефремов, Ньургун Пахомов, Петр Пахомов, Лаврентий Васильев, солбуйааччылар Николай Илларионов, Ион Никифоров, Павел Пахомов туруулаһан үлэлии сылдьаллар. Маны сэргэ нэһилиэкпитигэр спортивнай саала хочуолунайа маһынан оттуллар. Манна Семен Чен, Борис Слепцов, Спиридон Никифоров сыраларын ууран үлэлииллэр.
Амма Наахара нэһилиэгин хомунаалынай хаһаайыстыбатын туруу үлэһит уолаттарыгар Саҥа үүммүт 2024 сылга Кеша Лебедев «Олоҕу таптыахха» ырыатыгар
ылланарын курдук:
«Кыhыҥҥы тымныы хаайбатын
Сааскы дьыбар хаарыйбатын
Килбиэннээх киэҥ халлаан анныгар
Сайыҥҥы куйаас күөйбэтин
Күhүҥҥү ардах туппатын
Этэҥҥэ быр бааччы олоруҥ! -диэн баҕа санаабытын тириэрдэбит.
Ирина Корякина-ОЛЕСОВА.