Амма Наахара нэһилиэгэр күргүөмнээх субуотунньук ыам ыйын 1 күнүгэр– Эйэ, Үлэ, Маай бырааһынньыгар тэрилиннэ. Бырааһынньык күн ыраахтан дьон санаатын түмэр, ааспыт кэми санатар, дьону сомоҕолуур ырыалар араадьыйанан дуорайдылар. Быйыл сааспыт эрдэлээн, сир-дойду кууран муус устар ый ортотуттан олохтоохтор уһаайбаларын күннэтэ кыра-кыралаан харбанан, тэрилтэлэр тиэргэннэрин хомунан сыллата ыытыллар ырааһырдыы үлэтэ күүскэ барда.
Нэһилиэк баһылыга Захар Семёнович Александров, кини солбуйааччыта Сахаяна Иннокентьевна Михайлова салайыыларынан субуотунньук барыла сөптөөхтүк оҥоһуллубутун бэлиэтиэххэ сөп. Манна эбии Сардаана Константиновна Лебедева салайар «Түмэн» сынньалаҥ киинэ субуотунньук түмүгүнэн маннык анал ааттары олохтоото: «Түмсүүлээх түөлбэ», «Аҕам саастаах кыттааччы», оҕолорго «Түөлбэ эрэлэ», «Көхтөөх дьиэ-кэргэн». Бу Үлэ күнүн бырааһынньыгар барыта 135 киһи түөлбэнэн субуотунньукка кыттан уруккуттан сыһыарыллыбыт, ыйыллыбыт сирдэринэн хомуйар, ыраастыыр үлэни ыытта.
Биирдиилээн түөлбэлэринэн ыллахха Февронья Иванова салайар «Маяк» түөлбэтэ түмсэн парадтаан, ыллаан үлэҕэ киирдилэр. Манна 7 саастаах Ганя Пахомов, аҕа саастаах Александра Пахомова, көхтөөх Никифоровтар, Унаровтар, Ощепковтар дьиэ кэргэн кыттыыны ыллылар. Матрёна Романова салайар «Кэскил» түөлбэҕэ 3 саастаах уолаттар Харысхан Копырин, Өркөн Гаврильев, 75 саастаах Афанасий Афанасьевич Ефремов, Никифоровтар дьиэ кэргэн үлэни оройуттан туттулар. «Аргыс» түөлбэни Людмила Александрова салайбыта ыраатта. Бу түөлбэттэн субуотунньукка элбэх эр киһи тахсыбыта хайҕаллаах. Аргыстарга субуотунньукка 1 саастаах Айлана Макарова, 78 саастаах Мария Александровна Яковлева, үлэҕэ көхтөөх дьиэ кэргэн Макаровтар, Лебедевтар кытыннылар. Данил Макаров салайар «Сайдам» түөлбэҕэ саамай кыра кыттааччы 3,5 ыйдаах Мия Аллагузина сырытта. Кырачаан Мия ийэтэ Анна үлэлиир кэмигэр кэлээскэтигэр сытан утуйан оҕо саас оруосабай дьүһүнүн көрөн үөрэн мичилийдэ. «Сайдамнарга» 77 саастаах Александра Петровна Ефремова үлэҕэ кытынна. Манна Макаровтар, Мартыновтар, Заборовскайдар, Кононовтар дьиэ кэргэн үлэнэн күүрдүлэр. Нэһилиэккэ буолар субуотунньуктарга баһылыкпыт Захар Семенович, баһылык солбуйааччыта Сахаяна Михайлова куруутун бэйэлэринэн үлэлээн-хамнаан олохтоохторго холобур көрдөрөллөр. Биир санаанан олорор, үлэлиир нэһилиэккэ ситиһиилээх үлэ күнэ бүтэн, нэһилиэкпит хомуллан күөх от бытыгыраан тахсан эрэрэ тута харахха быраҕыллар буолла.
Таптыыр, олорор нэһилиэкпит Амма Наахарабыт күннэтэ уларыйар, тупсар, киэркэйэр.
Ирина Корякина — Олесова.