Бүгүн кулун тутар 15 күнүгэр Арассыыйа үрдүнэн, ол иһигэр Амма Наахараҕа дойдубут бэрэсидьиэнин быыбара саҕаланна. Бастакынан өрүү барыга көхтөөх Марианна Чен салайар «Чэлгийээнэ» эбэлэр түмсүүлэрэ, Захар Александров баһылыктаах олохтоох дьаһалта үлэһиттэрэ бэйэлэрин куоластарын биэрдилэр.
Амма Наахара нэһилиэгин 56 нүөмэрдээх быыбардыыр учаастагар күн аҥарын түмүгүнэн эбиэккэ диэри 100% Полина Петровна Кононова салайааччылаах «Дуораанчык» уһуйаан куолаһын биэрдэ. Бэрт кыранан Андрей Анастасьевич Захаров салайар ОДьХ кэлэктиибэ хаалан иһэр. Уопсайа 41,3% нэһилиэк олохтоохторо куоластаабыттар. Быыбардыыр хамыыһыйа бэрэссэдээтэлэ Наталья Николаевна Ефремова сэттэ киһилээх үлэтин састаабын кытары кэлбит дьону үөрэ көрсөллөр. Быйылгы быыбарга 6 саҥа быыбардааччы кыттыахтааҕыттан түөрдэ анал үөрэх кыһаларыгар куоластыыр бырааптаахтар. Манна бүгүн Юля Захарова, Спартак Макаров олохторугар аан маҥнай быыбардаатылар.
«Быыбар туһунан обществознание уруогар учууталбыт Алёна Егоровна Мартынова кэпсээбитэ. Быыбар диэн Арассыыйаҕа олорор киһи бэйэтин быраабын куоластаан ытык иэһин төлөөһүнэ буолар. Быыбар олохпутун быһаарар түгэн. Быыбарга үөрэн аҕай кэлбитим, номнуо улахан киһи буоллум дии санаатым. Бастаан хайдах эрэ дьикти этэ. Онтон үлэһиттэр ыйан-кэрдэн биэрдилэр. Өйдөбүнньүк бэлэх тутан соһуйдум. Быыбардарга өрүү кыттыаҕым, Арассыыйаҕа олорор эбээһинэспин толоруом дии саныыбын. Оскуолабын бүтэрэн үөрэнэ бараары бэлэмнэнэбин» -диэн үөрэ-көтө кэпсиир Спартак Макаров.
Ирина Корякина-Олесова.