Амматааҕы территориальнай быыбар хамыһыйатын бэрэссэдээтэлэ Наталья Алексеева иһитиннэрбитинэн, улууска быыбар балаҕан ыйын 2 күнүттэн саҕаланыа. Ыраах сытар учаастактарга дьон эрдэттэн куоластаан, бэйэлэрин Төрүт сокуонунан бэриллибит бырааптарын туһаныахтара. Куоластааһын хайдах барыай, хас бюллетень баар буоларый, улууска быыбар хаамыыта хайдах баран иһэрий?
“Билэргит курдук быйыл биһиги өрөспүүбүлүкэбитигэр улахан суолталаах быыбардар ыытыллаары тураллар. Ол курдук балаҕан ыйын 10 күнүгэр Ил Дарханы, Ил Түмэҥҥэ уонна улуус Мунньаҕар дьокутааттары талыахпыт. Ону сэргэ Абаҕа нэһилиэгэр баһылык быыбара болдьоҕун иннинэ ыытыллыа. Быйылгы быыбар үс күн устата барар. Ол эбэтэр балаҕан ыйын 8, 9, 10 күннэригэр кэлэн куоластыахха сөп. Манна быыбардааччы 4 бюллетени тутар, онтон Абаҕа нэһилиэгин олохтоохторо биэс бюллетени тутуохтара. Бу бюллетеннэр туһунан этэр буоллахха, өрөспүүбүлүкэбит Ил Дарханын быыбарыгар 4 кандидаттан биири, иккис бюллетень Ил Түмэн дьокутаатыгар биир мандаттаах Амма –Уус Маайа 31№-дээх уокуругар 3 кандидаттан биири, үһүс бюллетень партийнай испииһэгинэн 6 партияттан талабыт. Манна биһиги эмиэ биир партияҕа бэлиэ туруорабыт. Онтон төрдүс бюллетень оройуон Сэбиэтин дьокутааттарын талыы. Улуус үрдүнэн 10 уокуруктаахпыт. Уокуруктарбыт хас да мандаттаах буоланнар, хас биирдии куоластааччы биирдии куоластаах буолар. Урут элбэх мандаттаахха быыбардааччы 4-түү куоластаах эбит буоллаҕына, билигин быыбар сокуонунан биир куоластаах. Ол эбэтэр быыбардааччы 10 кандидаттан бииргэ эрэ куоластыыр. Онтон түмүккэ элбэх куоластаах 4 кандидат дьокутаат мандатын ылаллар. Биир уокурукка хас да нэһилиэк киирэр. Абаҕа нэһилиэгэр баһылык 4 кандидат турда. Мантан олохтоохтор биир кандидаты талаллар. Учаастактааҕы хамыһыйалар үлэлэрин атырдьах ыйын 30 күнүттэн саҕалыахтара. Биллэрин курдук биһиги улуус өрөспүүбүлүкэ үрдүнэн быыбары ыытыыга тэриллибит пилотнай бырайыакка 11 улуус иһигэр киирсэн үлэтин ыытар. Ол курдук быыбары сырдатыыга “мобильный УИК” диэн тэриллэн, биһиги чилиэннэрбит дьиэлэринэн сылдьан сырдатыы, быһаарыы үлэтин ыыталлар. Бу үлэ атырдьах ыйын 8 күнүттэн саҕаламмыта. Ыраах сытар учаастактарбытыгар куоластааһын балаҕан ыйын 2 күнүттэн ыытыллар. Ол эбэтэр Амма Наахара учаастактааҕы хамыһыйата ыраах сытар учаастагар бу күн быыбардата айанныыр. Ону кытта Эмис уонна Абаҕа нэһилиэктэрин хамыһыйалара балаҕан ыйын 6 күнүгэр барыахтаахтар”, — диэн Наталья Александровна быһаарар.
Манна санатан эттэххэ, быыбар үс күн ыытылларынан, эрдэ куоластааһын диэн суох. Ол эбэтэр быыбар иннинэ ханна эрэ ыраах барар дьон кыайан быыбарга кыттыбаттар. Арай өрөспүүбүлүкэ иһигэр барар буоллахтарына, учаастактааҕы хамыһыйаҕа, территориальнай быыбар хамыһыйатыгар, МФЦ- га эбэтэр судаарыстыбаннай өҥө порталын нөҥүө анал сайабылыанньа суруйан Ил Дархаҥҥа уонна Ил Түмэн дьокутааттарыгар, политическай баартыйаҕа баар буолар сиргитигэр куоластыахха сөп.
Ааптар: “Амма олоҕо” хаһыат