Балаҕан ыйын 1 күнэ. Үөрэх, билии күнэ үүннэ. Бүгүн үөрэх кыһалара ааннарын тэлэччи астылар, оскуолалар, уһуйааннар оҕо аймах саҥатынан туоллулар. Ол иһигэр В.В. Расторгуев аатынан Амма 2 нүөмэрдээх оскуолатыгар эмиэ 2023-2024 сыллаах саҥа үөрэх дьыла үүннэ.
Быйыл бу оскуолаҕа 40-тан тахса кырачаан оскуола боруогун маҥнайгытын атыллаата. 1 “а” кылаастары Мария Григорьевская, 1 “б” кылаастары Любовь Степанова үөрэнэр кылаастарыгар сиэтэн киллэрдилэр. Дойду бэрэсэдьиэнэ Владимир Путин бу сылы Педагог уонна нааставник ылынан биллэрбитэ. Онон сиэттэрэн быйыл үөрэхтэрин бүтэрэн дойдуларыгар учууталлыы кэлбит эдэр исписэлиистэри уруйуу-айхаллыы көрсүбүттэрэ ураты истиҥ, долгутуулаах буолла. Ол курдук, Дьокуускайдааҕа М.К. Аммосов аатынан ХИФУ нуучча тылын салаатын магистратуратын бүтэрбит Татьяна Лазарева нуучча тылын уонна литературатын учууталынан, А.Д. Макарова аатынан култуура уонна ускуустуба колледжын бүтэрбит Кристина Федорова ырыа учууталынан ананан үлэлии кэллилэр.
Маннык үөрүүлээх бэлиэ күҥҥэ оскуола боруогун атыллаабыт кырачааннары, үөрэнээччилэри, төрөппүттэри СӨ экэниэмикэтин миниистирэ Майя Данилова, Амма улууһун баһылыгын бастакы солбуйааччы Василий Бураев, Амма нэһилиэгин баһылыгын тутууга солбуйааччы Альберт Яковлев, Амма улууһун прокурора, юстиция аҕа сүбэһитэ Михаил Николаев, “Амарах сүрэх” уопсастыбаннай хамсааһын салайааччыта Надежда Шараборина, бастакы кылааска киирбит оҕолор төрөппүттэрин ааттарыттан Ульяна Ермакова, үрдүкү кылаас үөрэнээччилэрин төрөппүттэрин ааттарыттан оскуола бэрэсэдьиэнэ Роберт Босиков итии-истиҥ тылларынан эҕэрдэлээтилэр. Үөрүүлээх бэлиэ тэрээһин түмүгэр оскуола 11 кылааһын үөрэнээччилэрэ Гаврил Иванов уонна Дарина Лукина оскуола былааҕын өрө көтөхтүлэр.
Артем ОСИПОВ.