Амма нэһилиэгин биир ытык олохтооҕо, олоҕун тухары илиитин харытынан үлэлээбит, тыыл уонна үлэ бэтэрээнэ, “1941-1945 с.с. Аҕа дойду сэриитигэр килбиэннээх үлэтин иһин”, иккис степеннээх “Материнская доблесть” мэтээллээх Матрена Алексеева 95 сааһын томточчу туолла. Матрена Ивановнаны бу бэлиэ күнүнэн улуус баһылыга Степан Кузьмин дьиэтигэр тиийэн эҕэрдэлээтэ.
Матрена Ивановна олунньу 8 күнүгэр 1930 сыллаахха Амма оройуонун Хороҥку-Онньоойу диэн сиригэр күн сирин көрбүтэ. Ийэтэ эрдэ өлөн, 5 сааһыттан аймахтарыгар иитиллибитэ. Сэрии кэмигэр уонтан тахсалаах эрэ кыысчаан улахан дьону кытта тэбис тэҥҥэ үлэлиирэ, кыайыыны уһансара. Ол курдук оҕуруот көрөрө, балыктыыра, сүөһү да көрөрө, соҕотоҕун оҕус сиэтэн сыарҕаҕа кэбиһиилээх оту аҕалара. Дьүөгэтин кытта илиилэринэн мас эрбииллэрэ, хотоҥҥо сылдьаллара. Бу барыта саҥа чороччу улаатан эрэр кыргыттарга төһө да ыараханын иһин, тулуурдаахтык сылдьыбыттара. Матрена Ивановна 18 сааһыттан үлэһит буолбута. Бастаан промкомбинакка рабочайдаабыта. Онтон кэлин Лээгигэ баран ыанньыксыттаабыта, оробуочайдаабыта. Ол иһигэр маҕаһыыҥҥа муоста сууйбута, кассир-кыладыапсыгынан да сылдьыбыта, онтон Аммаҕа көһөн кэлэн баран интернакка, маҕаһыыҥҥа муоста сууйбута. Маннык илиитин харатынан бочуоттаах сынньалаҥҥа тахсыар диэри үтүө суобастаахтык үлэлээбитэ. Олоҕун аргыһа Систир Семенович Алексеевтыын дьоллоохтук олорон 6 оҕону төрөппүттэрэ. Алексеевтар 2006 сыллаахха кыһыл көмүс сыбаайбалыыр бэлиэтиир дьоро күннэрэ буолбута.
Матрена Ивановнаны бэлиэ, 95 сааһын туолбутунан улуус баһылыга Степан Кузьмин тиийэн эҕэрдэлээн, ытык кырдьаҕас этэҥҥэ оҕолорун, сиэннэрин, хос сиэннэрин тапталларыгар уйдаран 100 сааһыгар тиийэригэр, Кыайыы 80 сылын үөрэ-көтө көрсөрүгэр баҕа санаатын тириэртэ. Баһылык Матрена Ивановнаҕа Дойду Бэрэсидьиэнэ Владимир Путин уонна Ил Дархан Айсен Николаев эҕэрдэ открыткаларын, сибэкки дьөрбөтүн уонна СӨ ытык кырдьаҕаһа диэн бэлиэни туттарда. Кинини сэргэ бэйэлэрин эҕэрдэлэрин Амма улууһун бэтэрээннэрин Сэбиэтин бэрэссэдээтэлэ Мария Захарова, Амма нэһилиэгин баһылыгын солбуйааччы Василий Дьяконов, улуустааҕы нэһилиэнньэҕэ биир кэлим социальнай көмөнү оҥорор киин салайааччытын солбуйааччы Сахаяна Неустроева тириэртилэр, бэлэхтэрин туттардылар.
Ытык киһибит Матрена Ивановна өссө да чэгиэн буол, оҕолорун, сиэннэрин, хос сиэннэрин ортотугар дьоллоохтук олор диэн алгыыбыт.
“Амма олоҕо” хаһыат