Аммаҕа үөрэх салалтатын көҕүлээһининэн улуус оскуолаларыгар оҕо аймаҕы, үүнэр ыччаты иитиигэ тирэх буолар Аҕалар түмсүүлэрэ тэриллэннэр үлэлэрин саҕалаатылар. Аҕалар үлэлэрин көҕүлээччилэр бастакы сугулааннара улуустааҕы үөрэх салалтатын уонна Чакыр оскуолатын тэрийиилэринэн үрдүк таһымҥа ыытылынна.
Улуустааҕы үөрэх салалтатын көҕүлээһининэн аан бастаан тэриллибит оскуолатааҕы Аҕалар түмсүүлэрэ «Эркээйи эргиирэ» үөрэх бырагырааматынан аныгы кэмҥэ оҕону сайыннарар усулуобуйаны тэрийэр, төрүт түөлбэтин таптыыр, тыа сиригэр олохсуйар нэһилиэк кэлэр кэскилин ийэ тылынан, төрүт үгэстэринэн, үлэнэн иитэр соруктаах үлэлиэҕэ. Үлэ уопутун сырдатар, санаа атастаһар «Төгүрүк остуолга» Чакыртан Тихон Матвеев, Амматтан Петр Платонов, Сахаяр Дорофеев, Амма Наахараттан Ян Ефремов, Болугуртан Петр Филиппов, Покровкаттан Леонид Стручков, Бөтүҥтэн Алексей Никитин, Чапчылҕантан Тимур Пестерев, Эмистэн Гаврил Захаров, Авдей Тимофеев, Александр Ларионов онтон да атыттар кыттаннар ыытылла сылдьар үлэни сырдаттылар, тус санааларын эттилэр, сонун этиилэри киллэрдилэр. Оҕону иитиигэ туһалаах бырайыактары оҥорор былаһааккаҕа эмиэ элбэх санаа киирдэ, улуустааҕы тэрээһиннэргэ ылсарга баҕа санаалар этилиннилэр.
Сугулааҥҥа улуус баһылыгын бастакы солбуйааччы Василий Бураев кыттан оскуоланы кытта бииргэ үлэлииргэ бэлэмин, ыытыллар тэрээһиннэргэ көхтөөхтүк кытталларыгар ыҥырда. Дьокуускай куораттан «Барҕа» үөрэх бырагырааматын ааптара, элбэх бырайыактары олоххо киллэрэн үлэлэтэ сылдьар өрөспүүбүлүкэҕэ киэҥник биллэр уһуйааччы Дорҕоон Дохсун Воргушин уол оҕону иитиигэ ыыта сылдьар улахан үлэтин сырдаппыта, аҕаларга үгүс сүбэлэри биэрбитэ, ыйтыыларга хоруйдаабыта улахан болҕомтону тарта. Уһуйааччы эти-хааны чэбдигирдэр, сайыннарар ураты дьарыктарыгар олохтоох оскуола уолаттара астына сырыттылар, салгыы дьиэтээҕи сорудахтары ылан хааллылар.
Сугулаан кыттыылаахтара Чакыр оскуолатын кыргыттарын вокальнай инструментальнай ансаамбылын олус биһирээтилэр, аҕыйах ый иһигэр ансаамбылы тэрийбит элбэх оҕолоох аҕа Юрий Орестов оҕолор дьоҕурдарын арыйар, сайыннарар үлэтэ үтүө түмүктээх буолбутун илэ көрөн-истэн итэҕэйдилэр.
Сугулааны оскуола дириэктэрэ Семен Шадрин, күрэхтэһиилэри нэһилиэк түмсүүтүн салайааччыта Тихон Матвеев бэркэ тэрийэн ыыттылар. Түмүккэ ыытыллар үлэ үтүө түмүктээх буоларыгар оскуолалар Аҕа түмсүүлэрэ нэһилиэк аҕа түмсүүлэрин кытта бииргэ үлэлииргэ быһаардылар уонна оскуолатааҕы түмсүүлэр улуустааҕы салайааччыларынан үөрэх салалтатын начаалынньыгын Николай Ларионовы биир санаанан таллылар.
Алтана АРТЕМЬЕВА