Аммаҕа быыбардаабыт дьон ахсаана кыралаан эбиллэр

Россия салайааччытын талар улахан быыбарга Амма улууһун дьоно кыттыылара көхтөөх. Үс күннээх быыбар иккис күнүн саҕаланыыта өрөспүүбүлүкэ көрдөрүүтүгэр 10 иһигэр сылдьар.

Быыбары ыытар ыстаап биэрэр субуоккатыттан көрдөххө, кулун  тутар 16 күнүн күнүс 12 чаас көрдөрүүтүнэн улуус олохтоохторо 55,56 бырыһыаннара быыбардыыр бүллүтүөн нөҥүө санааларын тиэртилэр. Бэҕэһээ күнтэн  саамай үчүгэй көрдөрүүлээҕинэн Сулҕаччы иһэр, манна олохтоохтор 78,30 бырыһыаннара куоластарын биэрдилэр. Хамыыһыйа чилиэннэрэ этэллэринэн, өссө үрдүк көрдөрүүнү ситиһиэхтэрин,нэһилиэккэ пропискалаах, испииһэккэ киирбит эрээри, миэстэтигэр олорбот дьон элбэхтэрэ охсууну оҥорор. Саамай кыра көрдөрүүлээх билигин даҕаны улуус киинэ иһэр, 45 нүөмэрдээх быыбардыыр учаастакка 45,31  бырыһыан киһи куоластаата. Ол эрээри, урукку сыллар уопуттарыттан көрдөххө, быыбар бүтэһик күнүгэр бу сыыппара лаппа тупсуохтаах диэн сабаҕалыыбыт. Нэһилиэктэр ортолоругар хаалыылаахтарынан Бөтүҥү (47,61) уонна Чакыры (48,07) көрөбүт.

Онон, доҕоттор, сааскы маннык чаҕылхай күн быыбардыыр учаастаккытыгар тиийэҥҥит бэйэҕит санааҕытын куоласкыт нөҥүө биллэриҥ. Эппиэстинэстээх быыбарга хаалыылаахтар ахсааннарыгар киирбэт инниттэн, Дойдум кэлэр 6 сылга сайдар хайысхатыгар кылааппын киллэрбитим диир гына быһаарыылаах бүллүтүөнү уурунаҕа уган кэбиһиҥ.

«Амма олоҕо» хаһыат.

Читайте дальше