Аммаҕа физкультура учууталларыгар анаммыт кинигэ тахсарынан матырыйааллары бэлэмнээһин үлэтинэн сүбэ мунньах буолла. Оскуолаларга араас сылларга үлэлээн ааспыт, бэлиэ суолу хаалларбыт, бу күҥҥэ таһаарыылаахтык үлэлии-хамсыы сылдьар, киэҥ эйгэҕэ биллэр физкультура учууталларын туһунан матырыйааллары хомуйуу үлэтэ салҕанар.
Кинигэни таһаарыы туһунан сүбэ мунньаҕы үөрэх салалтатын начаалынньыга Николай Ларионов салайан ыытта. Хомуйан оҥорооччулар физкультура учууталларынан, салайааччыларынан үлэлээбит, билигин бочуоттаах сынньалаҥҥа олорор Михаил Жирков уонна Николай Гурьев бу кинигэҕэ ситиһиилээх педагогтар, ону тэҥэ учууталтан саҕалаан физкультура, спорт эйгэтигэр, нэһилиэнньэ, өрөспүүбүлүкэ, уопсастыба олоҕор бэйэлэрин тус кылааттарын киллэрбит, салайааччыга тиийэ үүммүт физкультура учууталлара туһунан сырдатыллыахтаахтарын бэлиэтээн эттилэр. Манан ситимнээн оскуолалар дириэктэрдэригэр эбии сорудах бэрилиннэ. Түмүккэ Н.С.Захаров-Сахаачча аатынан оҕо успуордун оскуолатыгар дириэктэри үөрэх уонна иитии чааһыгар солбуйааччынан өр сылларга үлэлээбит Виктория Владимирова кэлэр сылга Амма улууһугар успуорт оскуолата оҕо аймахха аанын арыйбыта 40 сыла туоларынан оҕо успуорда сайдыытын сырдатар кинигэ тахсара былааннанарын туһунан үөрүүлээх сонуну иһитиннэрдэ.
Алтана АРТЕМЬЕВА, үөрэх салалтатын иитэр үлэҕэ уоннэ эбии үөрэхтээһиҥҥэ сүрүннүүр исписэлииһэ