О.П. Иванова-Сидоркевич аатынан оҕо айар, сайдар киинин иһинэн үлэлиир “Амма кэскилэ” оҕо уопсастыбаннай тэрилтэ «AMGARUN» бырайыага быйылгы үөрэх дьылыгар Ил Дархан Айсен Николаев гранын кыайыылааҕа буолан турар. Бу экология хайысхатыгар 21 сайаапкаттан 4 бастыҥнар истэригэр киирэн кыайыылааҕынан тахсыбыта. Ол чэрчитинэн атырдьах ыйын 19 күнүгэр Амма улууһугар «AMGARUN» экологическай кырааскалаах сүүрүү диэн оҕолорго аналлаах күрэх бырайыага иккис төгүлүн И.А. Швердин аатынан култуура уонна сынньалаҥ пааркатыгар буолан ааста. Бырайыагы олоххо киллэриигэ үлэлэспит дьонунан О.П. Иванова-Сидоркевич аатынан Амматааҕы айар сайдыы киинин үлэһитэ Надежда Филиппова уонна “Амма кэскилэ” оҕо уопсастыбаннай тэрилтэ салайааччыта Зоя Пахомова буолаллар. Күрэхтэһии сүрүн сыалынан оҕону кыра эрдэҕиттэн айылҕа кэрэ эйгэтигэр сыһыарыы уонна ону харыстыырга үөрэтии. Спордунан дьарыктаныы – чөл олоҕу тутуһуу биир улахан көрүҥэ. Тэрээһини иилээн-саҕалаан улуус култуураҕа салалтатын үлэһитэ Николай Нестеров ыытта.
“Амма кэскилэ” оҕо уопсастыбаннай тэрилтэ “AMGARUN” бырайыагынан ыытыллыбыт тэрээһинигэр эҕэрдэ тылы улуус баһылыгын бастакы солбуйааччы Василий Бураев уонна бырайыак ааптардара Зоя Пахомова, Надежда Филиппова эттилэр. Ону таһынан Дьокуускай куораттан кэлбит күндү ыалдьыппыт, быйылгы “Дыгын оонньууларын” кыайыылааҕа Вячеслав Дьяконов сүүрүү иннинэ кыттааччыларга эрчиллиилэри көрдөрдө, турукка киллэртээтэ. Манна улуустан барыта 200-тэн тахса оҕо кытынна.
Ити күн өссө оҕолор пластиковай бытыылка хаппахтарын туттаран бириистэри ыллылар. Хаппахтары хомуйуу кыайыылаахтарынан бастакы миэстэни Амматааҕы лиссиэй 5 кылааһын үөрэнээччитэ Леонид Захаров ылла. Иккис миэстэни Эмис орто оскуолатын 4 кылааһын үөрэнээччитэ Эрхан Захаров. Үһүс миэстэни Амма орто оскуолатын 1 кылааһын үөрэнээччитэ Мичил Бурцев. Маны таһынан стартовай нүөмэр үс бастыҥ кыттааччыларынан Ванесса Петрова, Настя Эверстова, Милена Сидорова буоллулар.
«AMGARUN» кырааскалаах сүүрүү түмүгүнэн кыргыттарга уонна уолаттарга 10 бастыҥнар миэстэлэрэ көрүлүннэ. Ол курдук, кыргыттарга Федорова Каролина — 10, Кралина Таисия — 9, Федорова Чэлгийээнэ — 8, Иванова Динара — 7, Наумова Маргарита — 6, Федорова Юлиана — 5, Федорова Марина — 4, Нерлова Лилия — 3, Захарова Катя — 2. Иккис төгүлүн ыытыллар «AMGARUN» кырааскалаах сүүрүү муҥутуур кыайыылааҕынан Федорова Лера таҕыста. Оттон уолаттарга Неустроев Иван — 10, Константинов Степан — 9, Алексеев Харысхан — 8, Артемьев Тимур — 7, Алексеев Артем — 6, Марков Артем — 5, Исаков Игорь — 4, Никитин Иван — 3, Николаев Максим — 2. Балартан кырааскалаах сүүрүү кыайыылааҕынан Наумов Виталий буолла.
Амма орто оскуолатын 8 кылааһын үөрэнээччитэ, быйылгы “Кырааскалаах сүүрүү” тэрээһин бастакы кыттааччыларыттан биирдэстэрэ Иван Неустроевтан күрэхтэһиигэ кыттыытын туһунан санаатын иһиттибит: “Мин бэйэм сүүрүүнэн дьарыгырабын. Билигин оҕо спортивнай “Олимпик” лааҕырыгар сылдьабын. “Кырааскалаах сүүрүүгэ” аан бастакытын кыттан бэйэбин холонон көрдүм. Сүүрүүгэ 10 миэстэни ыллым. Бу арыый мөлтөһүөр соҕус көрдөрүү. Онон, эһиил эмиэ кыттыам диэн санаалаахпын”, — диэн этэр Иван.
Тэрээһин түмүгэр Вячеслав Дьяконов бэйэтин санаатын үллэһиннэ: “Маннык тэрээһиҥҥэ аан бастакытын ыалдьыт быһыытынан ыҥырыллан сырыттым. Күрэхтэһиини илэ харахпынан олус сэргии уонна кэрэхсии көрдүм. Оҕолорго аналлаах “Кырааскалаах сүүрүү” диэн анал бырайыак олоххо киирбитэ олус кэрэхсэбиллээх уонна суолталаах. Туох барыта кыраттан саҕаланар үгэстээх. Оҕо оҕо сааһыгар оонньоон-көрүлээн хаалыахтаах. Ол иһин оҕо спорду эмиэ кыраттан саҕалыахтаах. Онон, спорду таптааҥ”, — диэн Вячеслав инники кэскиллээх санаатын эттэ.
Артем ОСИПОВ.