Ф. Потапов аатынан норуот айымньытын дьиэтигэр СӨ Бырабыыталыстыбатын отчуоттуур бөлөҕүн иһитиннэриитин оҥордо. Отчуоту СӨ Бырабыыталыстыбатын бэрэссэдээтэлин солбуйааччы Сергей Местников туруорда. Кини олус тиийимтиэтик, ааҕан эрэ буолбакка, бэйэтин тылынан ааспыт сылга ыытыллыбыт үлэлэр, ситиһиилэр, ылыллыбыт кирбиилэр тустарынан кэпсээтэ. Биир сыллаах үлэни чааһы кыайбат бириэмэ иһигэр бэрт сиһилии билиһиннэрдилэр. Дакылаат кэмигэр ол барыта сыыппараларынан, тэҥнэбиллэринэн бигэргэнэн улахан экраҥҥа көстө турбута, истээччилэргэ интэриэһинэй буолла.
Сүрүн дакылаат кэнниттэн биир дойдулаахпыт, Ил Дархан Сүбэһитэ Майя Данилова алта сыл устата кураторынан үлэлээн туох ситиһиллибитин кылгастык билиһиннэрдэ. Майя Андреевна бу кэм устата Николай Архипов баһылыктаах дьаһалтаны кытта ыкса сибээстээхтик үлэлээбиттэрин, ол түмүгэр үгүс үлэ ситиһиллибитин бэлиэтээтэ. Ол курдук холобура уопсайа 18 социальнай эбийиэк киирбитин, ол иһигэр 5 спорт, 4 култуура, 1 нэһилиэнньэ социальнай көмүскэлин киинэ, 3 уһуйаан, 3 ФАП уонна врачебнай амбулатория уонна икки оскуола киирбитин эттэ. Ону сэргэ 77 км массыына суола, 9 муоста оҥоһуллубут. Кини бу эттэххэ эрэ дөбөҥ сыыппара. Онтон кинилэр кэннилэригэр уһун унньуктаах үлэлэр ыытыллыбыттарын этэр уонна Амма олохтоохторун буолбут бары улахан тэрээһиннэргэ көхтөөх кыттыыны ылбыттарын, истиҥ өйөбүллэрин иһин дириҥ махталын биллэрдэ. Кини бэйэтин куратордыыр эстафетатын Амма улууһун саҥа кураторыгар, СӨ Үөрэххэ уонна наукаҕа миниистиригэр Нюргуна Соколоваҕа туттарда. Ол гынан баран манан кини бүтэн, сүтэн хаалбатын, син биир өйөбүл, күүс-көмө буола туруом диэн эттэ. Онтон саҥа куратор ылыллыбыт тэтими түһэрбэккэ үлэлиэхпит диэн эттэ.
Дьэ бу кэнниттэн ыйытыылар биир-биир субуллан, ону кытта дьон бэйэтин санаатын да тириэрдэн мунньах 2 аҥаар чаастан ордук кэм барда. Амма нэһилиэгин олохтоохторо хаһан да буоларын курдук киин ититэр ситимҥэ холбонууну, үрдүк күүрүүлээх уот, газ кэлиитин ыйыттылар, ону сэргэ Амма өрүһү харыстааһын, ОТП сирдэригэр бултааһыны, учууталлар хамнастара үрдээһинин, Аммаҕа орто анал үөрэх тэрилтэтэ тоҕо суоҕуй, хаарбах дьиэттэн көһөрүү бырагыраамата салгыы үлэлиир дуу, бэйдиэ сылдьар ыттары бэрээдэктээһин, урбаанньыттар эбийиэктэрин киин ититэр ситимҥэ холбооһун, оттук маһы булууну кыһалҕаларын, эридьиэстэрин, илин эҥэр улуустарыгар тыа сирин сайдыытын туспа бырагырааматын киллэрии, тыа хаһаайыстыбатыгар үлэлиир дьоҥҥо ИЖС бырагырааматын сөргүтүү, бэтэринээрдэргэ “земскэй бэтэринээр” бырагырааматын киллэрии, айан суолун асфаллааһын, бибилэтиэкэлэри тутуу, Аммаҕа көнньүүһүнэ тутуутун уонна да атын элбэх ыйытыктары биэрдилэр, бэйэлэрин көрүүлэрин киллэрдилэр.
“Амма улууһугар ыытыллыбыт отчуоттар кэннилэриттэн аммалар дьоһуннаах боппуруостары туруорсар эбиккит диэн санааҕа кэллим. Үс күн устата элбэх ыйытыылар киирдилэр, санааларгытын да иһиттибит. Ол барыта биһиги инники үлэбит былаанын торумнуурбутугар бу олус суолталаах. Эһиги ордук ханна болҕомто уурар эбиккитий диир буоллахха, ол айылҕа уонна Амма өрүс. Ол саамай сөп. Ону кытта тыа сирин сайдыыта. Манна ордук кадр тиийбэтэ сытыытык турар буолла. Хайа баҕарар эйгэҕэ. Онно биллэн туран үлэ ыытыллар гынан баран, өссө күүһүрүө. Социальнай эбийиэктэри тутуу туһунан этии аҕыйаабыт курдук. Тоҕо диэтэр хас биирдии нэһилиэккэ тиийдэххэ, саҥа социальнай эбийиэктэр дьэндэспиттэр. Аны сайын Олоҥхо ыһыаҕа ыытыллыаҕа. Онон отчуоттар түмүктэннилэр эрээри, үлэбит салгыы салҕанар”, — диэн Сергей Васильевич бэйэтин түмүктүүр тылыгар тириэртэ.
Отчуот кэнниттэн бастыҥнарга үрдүк наҕарадаалары туттардылар. Ол курдук СӨ Бырабыыталыстыбатын Бочуотунай грамотатынан дьиэҕэ социальнай көмөнү оҥоруу отделениетын сэбиэдиссэйэ Элеонора Адамова, Ил Түмэн бэрэссэдээтэлин Махталынан кииннэммит бухгалтерия салайааччыта Роман Алексеев, СӨ Бырабыыталыстыбатын Махталынан Амматааҕы оҕо спортивнай оскуолатын дириэктэрин иитэр-үөрэтэр үлэҕэ солбуйааччы Виктория Владимирова, киин балыыһа хирург – бырааһа Иван Чириков, СӨ Бырабыыталыстыбатын бэрэссэдээтэлин солбуйааччытын Махтал суругунан улуус дьаһалтатын суоппара Николай Солдатов, “СӨ доруобуйатын харыстабылын туйгуна” бэлиэнэн киин балыыһа младшай медицинскэй персонала Надежда Барановская, “СӨ тыатын хаһаайыстыбатын туйгуна” бэлиэнэн улуус баһылыгын бастакы солбуйааччы Василий Бураев, “За вклад заповедного дела” диэн СӨ айылҕа харыстыбалын министиэристибэтин бочуоттаах бэлиэтинэн Амматааҕы айылҕа харыстабылын инспекциятын кылаабынай судаарыстыбаннай инспектора Евгений Егоров, СӨ Айылҕа харыстабылын Бочуоттаах грамотатынан ойуур хаһаайыстыбатын салайааччыта Николай Иванов, кылаабынай буҕаалтыр Мария Нерлова, СӨ Тутууга министиэристибэтин Бочуотунай грамотатынан улуус баһылыгын тутууга солбуйааччы Виктор Смирников, СӨ Үөрэххэ уонна наукаҕа министиэристибэтин Бочуотунай грамотатынан Амматааҕы лиссиэй учуутала Мария Алексеева, Махтал суругунан “Радуга” уһуйаан иитээччитэ Александра Давыдова, “Хатыҥчаана” уһуйаан техүлэһитэ Мария Окорокова, СӨ тырааныспар уонна суол хаһаайыстыбатын Махталынан киин балыыһа суоппара Алексей Герасимов наҕараадаланнылар. Саха тылын кабинетын сэртипикээтэ лиссиэйгэ бэрилиннэ. Маны сэргэ эдэр ыаллар дьиэ тутталларыгар сэртипикээттэри туттулар.
Ити курдук улуус киинигэр ыытыллыбыт отчуот өрө күүрүүлээхтик түмүктэннэ. Отчуоту уопсайа 146 киһи кэлэн иһиттэ уонна биир санаанан биһирээтэ.
“Амма олоҕо” хаһыат