Күннүк Уурастыырап аатынан Амматааҕы киин бибилэтиэкэ “Таайтарыылаах таҥха” киэһэни тэрийбитэ хаһыс да сыла. Быйыл даҕаны инники дьылҕаларын ыйдаҥардан билиэн-көрүөн, идэлээх дьон ыллыктаах тылларын истиэн баҕалаахтар элбэхтэр.
Тэрээһин кыттыылаахтара таро хаартынан билгэлэннилэр, илиинэн дьылҕаларын аахтардылар, рунанан, бит-билгэ хаартынан, кинигэнэн таайтарыыга сырыттылар, көстүбэт эйгэни кытта сибээстээх биллэр сэрэбиэйдьит, уйулҕаһыт, алгысчыт Варвара Федорова алгыһын ыллылар. Саҥаны, сонуну сэргиир, үлэтигэр аныгы кэм технологияларын таба туһанар коллектив олохсуйбут сэрэбиэйдэнии көрүҥнэрин сэргэ компьютер көмөтүнэн киһи төрөөбүт күнүнэн киниэхэ сөп түбэһэр кинигэлэри талан биэрэр сүбэлэрин эмиэ элбэх киһи туһанна.
Таҥха киэһэтин кыраайы үөрэтэр салаа кылаабынай бибилэтиэкэрэ Вероника Стручкова иилээн-саҕалаан ыытта. Кини бу киэhэ кэлбит ыалдьыттарга анаан сахаларга былыр-былыргыттан тарҕаммыт Таҥха ɵйдɵбүлүн, кэмин суолтатын, оонньууларын араастарын тустарынан уонна таҥха кэмигэр олоххо буолбут араас түбэлтэлэри сэhэргээтэ. Хас биирдии киһи таайтарыылаах кэм туhунан элбэҕи биллэ, сонуну иhиттэ.
-Мин Бүтэйдээххэ олорор айылҕаттан айдарыылах Варвара Николаевна Федоровалыын кэпсэтиэхпин баҕарбытым ыраатта. Ону баара, бэркэ ытыктанар киһи Аммаҕа ыҥырыллан кэлэр буолбутун истэммин тута суруйтара охсоммун, сирэй көрсөн кыһалҕабын быһаартарарга көмөлөһүннэрэр түгэн көстүбүтүттэн, барыта баҕарбытым курдук табыллыбытыттан наһаа үөрдүм. Күүппүтүм курдук, санаабын сааһылаан, инники олохпор сүбэ-ама биэрбититтэн бүгүн кэлбит сыалбын-сорукпун ситтим диэн астынным. Ыраах айаннаабакка, ыраата барбакка кэпсэтэр, сүбэлэтэр түгэн көстүбүтэ – эмиэ бэйэтэ туспа табыллыы. Онон олохтоох бибилэтиэкэ үлэһиттэрэ чараас эйгэ саамай муҥутаан аһыллар кэмигэр маннык тэрээһини ыыталларыгар махталым улахан,- диэн “Таайтарыылаах таҥха” киэһэтин ыалдьыта санаатын үллэһиннэ.
Иккис кэпсэппит киһим билинэринэн, сэрэбиэй киэһэтигэр аан маҥнайгытын сылдьар. Анаан-минээн илиинэн таайтарыыга кэлэн мунаарар ыйытыыларыгар эппиэттэри ылбытын кэпсиир. “Эппиттэрэ, кэпсээбиттэрэ сүрүннээн сөп түбэстэ. Ытыскын көрөн киһи дьылҕатын кэпсииллэрэ, инники олоххор сүбэ-ама биэрэллэрэ бэрт дьикти, долгутуулаах эбит”,- диэн түмүктүүр.
Ити курдук, Таҥха саҕаланан дьон инники олоҕун тымтыктанан көрөр кэмнэригэр киһи куттала суох сэрэбиэйдэнии көрүҥнэрин сэрэнэн туһанан инникини тымтыктанан көрүөхтэрин сөп. Оттон Таҥха кэмигэр салгыны хамсатар, дьыбардаахха улаханнык саҥарар сэттээх диэн өбүгэлэрбит этэллэрэ. Бу кэмҥэ аан дойду дьулайа аһыллан, чараас эйгэ орто дойду олоҕор, икки атахтаах дьылҕатыгар дьайыыта күүһүрэр.
“Амма олоҕо” хаһыат.