Тохсунньу ыйбыт, куолутунан, тууйар тымныытын түһэрэн турар. Кэлии-барыы намыраан, улахан кыһалҕата суох киһи таһырдьа быкпат үлүгэрэ. Арай, бу күннэргэ ОДьКХ үлэһиттэрэ иҥнэ үрдүгэр сылдьаллар.
Саахал тахсар түгэнигэр түргэнник оҥоро-оһоро охсор соруктаах эбии дьуһуурунай биригээдэ олохтонон күнүстэри-түүннэри бэлэм олорор. Амматааҕы ОДьКХ дириэктэрэ Виктор Кузнецов: “Саҥа дьыл уһун өрөбүллэригэр күүһүрдүллүбүт режиминэн үлэлээбиппит. Онтон халлаан улаханнык тымныйбытыгар хочуолунайдарбытын, онтон да атын эбийиэктэрбитин күүскэ кэтиибит. Хата, улахан саахал суох. Кыра алдьаныылар, тэһэ барыылар бааллар да, билиҥҥитэ кэмигэр саба тутан иһэбит”, — диэн этэр.
Дириэктэр этэринэн, бары хочуолунайдарга ый устата оттор чохторун саппааһа баар: “Сангартан 10 тыһ., Дьабарыкы Хайатыттан 7 тыһ. уонна былырыыҥы кур чохтон 20 тыһыынча туонна чох хаһааһа сытар. Эбии Харбалаахтан 40 тыһ. туонна чоҕу кыһын устата таһыахпыт”.
Олег Егоров.