Амма нэһилиэгин дьаһалтата 2022 сыллаахха анал байыаннай дьайыы саҕаланыаҕыттан дойдуларын көмүскүү сылдьар биир дойдулаахтарыгар уонна кинилэр дьиэ кэргэттэригэр ахсаабат көмөтүн оҥорор. “Бары биир сомоҕо күүс буоллахпытына, хайаатар да кыайыы кэлиэҕэ, уолаттарбыт этэҥҥэ эргиллэн кэлиэхтэрэ” диэн санаанан салайтаран ыытыллар үлэҕэ кыттыһан кылаатын киллэрэр. Бу туһунан нэһилиэк баһылыга Михаил Артемьевы кытта кэпсэттибит.
“Күн бүгүн Амма нэһилиэгиттэн уонна мантан төрүттээх уолаттар, уопсайа 91 уол анал байыаннай дьайыыга кытта сылдьаллар. Мантан 21 уола 2022 сыллаахха мобилизацияланан барбытттара. Бу күҥҥэ биир уолбут бааһыран, дойдутугар төннөн кэллэ. Биһиги нэһилиэкпит дьаһалтата байыаннай дьайыы саҕаланыаҕыттан, онно барбыт уолаттарбыт дьиэ кэргэттэрин кытта тута сибээстэһэн, кинилэри кытта кэпсэтэн туох кыалларынан көмөнү оҥорууну саҕалаабыта. Билэргит курдук тыйыс тымныылаах Саха сиригэр олорорбутунан сибээстээн, күүстээх көмө оттук маһы бэлэмнээһиҥҥэ, кыстыыр муустарын аҕалан биэриигэ уонна киин ититэр ситимҥэ холбонууга туһуланар. Ол курдук байыаннай дьайыы саҕаланыаҕыттан уопсайа 760 куб мас бэлэмнэнэн ыалларга тиэрдиллибитэ.
Бу мас бэлэмнээһинигэр бэйэбит дьаһалтабытын кытта түөлбэлэр, Амма нэһилиэгэр баар тэрилтэлэр, чуолаан дьиэ-уот коммунальнай хаһаайыстыбатыттан, баһаарынай чаастан, полицияттан уонна улуус дьаһалтатыттан уолаттар кэлэн субуотунньукка кыттыбыттара. Бу мас бэлэмнээһинигэр биһиэхэ ойуур хаһаайыстыбата, ГАУ “Центрлес”, ойуур авиациятын тэрилтэлэрэ олох үчүгэй көмөнү оҥороллор. Маны сэргэ күһүн муус ылыытыгар сыл аайы Амма 2№-дээх оскуолатын үөрэнээччилэрэ кэлэн тэбис тэҥҥэ үлэлииллэр. Ону таһынан нэһилиэккэ баар бары тэрилтэлэр эмиэ бэйэлэрин уолаттарын дьонун умнубакка туох баарынан көмөлөһөллөрүн эмиэ бэлиэтиибин.
Онон ыытыллар субуотунньуктарга, бэйэлэрин баҕа өртүлэринэн күүс-көмө буолар сылдьар тэрилтэлэр кэлэктииптэригэр, уопсай кыайыы туһугар көхтөөх кыттыыны ылалларыттан биһиги тэрийэр дьон үөрэбит уонна махтанабыт. Биир тыын боппуруоһунан киин ититэр ситимҥэ холбонуу буолар. Маныаха ааспыт сылга уонна быйыл кэргэттэрэ, эбэтэр оҕолоро анал байыаннай дьайыыга сылдьар хас да ыалга турбаларын атыылаһалларыгар көмөлөһөн, дьиэ-уот коммунальнай хаһаайыстыбаны кытта бииргэ үлэлээн дьиэлэригэр киин ититэр ситим киллэрдибит.
Маны сэргэ улууска ыытыллар бары аһымал аахсыйаларга, ыытыллар үлэлэртэн туора турбакка бары көмөлөһө сылдьабыт. Ол курдук нэһилиэкпит түөлбэлэрин олохтоохторо сиэккэ өрүүтэ буоллун, гуманитарнай көмөнү хомуйуу, үп-харчы да өртүнэн барытыгар көхтөөхтүк кытталлар. Анал байыаннай дьайыыга сылдьар уолаттар дьиэ кэргэттэрэ биһиэхэ кыһалҕаларынан кэллэхтэринэ барытын истэн, икки өртүттэн сөбүлэһэн, турар кыһалҕаны быһаарабыт. Манна анаан-минээн солбуйааччым Василий Петрович Дьяконов үлэлэһэр. Биһиги бу ыытар үлэбит хайаатар да дойдуларын көмүскүү сылдьар биир дойдулаахтарбытыгар күүстэригэр күүс эбиэ, кинилэр сотору кыайыы көтөллөөх эргиллэн кэлэллэригэр көмөлөһүө диэн эрэллээхпит”, — диэн Михаил Алексеевич сырдатта.
Нэһилиэк баһылыгын кытта сиһилии кэпсэтиини “Амма олоҕо” хаһыакка ааҕаарын.
“Амма олоҕо” хаһыат