Бүгүн Өрөспүүбүлүкэ Судаарыстыбаннаһын күнүн көрсө Ил Дархан Айсен Николаев үгэс быһыытынан олохтоохтору кытта быһа эпииргэ тахсар. Маннык кэпсэтиилэргэ аммалар эмиэ хайаатар да көхтөөхтүк кытталлар. Улуус уопсастыбаннай эколога Анна Шишигина быһа сибээскэ тахсан экологияҕа туһаайыллыбыт боппуруоһун биэрдэ.
“Мин уопсастыбаннай эколог быһыытынан үлэлээбитим балачча буолла. Тоҕо диэтэр биһиги хайдах айылҕалаах сиргэ-уокка олорорбутуттан доруобуйабыт, чөл буолуубут улахан тутулуктаах. Онон мин Айсен Сергеевичтан кэнники кэмҥэ олус элбэх бөх мунньуллар боппуруоһун быһаарыыга Чокурдаахха уонна Депутатскайга бөҕү уматыыга кыра установкалар туруоруллубуттара көдьүүстээх буолбутун, ол практика өрөспүүбүлүкэ атын улуустарыгар тарҕаныан сөп дуо диэн ыйыппытым. Тоҕо диэтэр сылтан сыл мунньуллар бөхпүт элбээн, сири -уоту киртитиитэ элбээн иһэр. Онон өрөспүүбүлүкэҕэ уопсайынан сыбаалкалары ыраастааһыҥҥа туох былааннар баалларый диэн ыйыттым. Манна Айсен Сергеевич тулалыыр эйгэни харыстааһын олус суолталаах боппуруос буоларын этэн туран, бөҕү уматар дьоҕус установкалары туруоруу үлэтин салгыахпыт диэтэ. Ону сэргэ сорох улуустарга умаппакка, иккистээн переработкалыыры киллэриигэ үлэни ыытыахпыт диэн эттэ. Чахчы ити дьоҕус установкалары холобура Чокурдаахха да, Депутатскайга да олус үчүгэйдик үлэлии тураллар эбит. Бэйэтэ Чокурдаахха сылдьан эмиэ көрөн кэлбит. Маннык установка Орто Халымаҕа туруораары сылдьаллар. Биллэн туран билигин установкалары үлэлэтиигэ уматык, тарыып боппуруостара турар диэн этэр Айсен Сергеевич. Мин Ил Дархаммыт экология боппуруоһун бастакы күөҥҥэ тутарын сэргии иһиттим ”, — диэн Анна Зиновьевна санаатын тириэртэ.
«Амма олоҕо» хаһыат
