Бу күннэргэ Амма нэһилиэгэр «Сандалы» маҕаһыыҥҥа «Байанай – мин үҥэр таҥарам» диэн Арассыыйа суруйааччыларын сойууһун чилиэнэ, СӨ культуратын үтүөлээх үлэһитэ, Амма улууһун, Соморсун, Сулҕаччы нэһилиэктэрин бочуоттаах олохтооҕо, “Гражданскай килбиэн” бэлиэ хаһаайына Семен Спиридонович Капитонов саҥа кинигэтэ атыыга таҕыста.
Семен Спиридонович талааннаах бэйиэт эрэ буолбакка, кини өссө сорсуннаах булчут буоларын бу кинигэттэн ааҕан биллибит.
Кинигэҕэ ааптар 17 уочарката, “Дорообо, мин эһэм бултаабыт Эбэтэ!” поэмата уонна булт туһунан алта хоһооно киирбиттэр. Кинигэни худуоһунньук Николай Рязанскай уруһуйдара киэргэппиттэр. Саҥа кинигэ “АЛТА” издательствоҕа оҥоһуллан, Дьокуускайдааҕы “Офсет” типографияҕа 300 ахсаанынан бэчээттэммит.
Манна Семен Спиридонович талааннаах очеркист, кэпсээнньит быһыытынан арыллыбыт. Булт абыгар хайдах ылларбытын, бэйэтэ этэринии, кыттыгастарын кытта Куолума диэн Алдан өрүс биир улахан салаатыгар аар тайҕа маанылаах кыылыгар буур тайахха бултаабыттарын уус-уран тыл күүһүнэн итэҕэтиилээхтик суруйбут.
Булт тиэмэтигэр кинигэ суруйуохпун баҕарабын диэн бэйиэт өссө 70 сааһын бэлиэтиир үөрүүлээх үбүлүөйүгэр эрэннэрэн турар. Ол баҕа санаатын толорон, быйыл бар дьонугар саҥа кинигэтин бэлэх уунна.
Саҥа кинигэ сүрэхтэнэр дьоро күнүгэр Семен Спиридонович үөрүүтүн үллэстэн, улуус баһылыгын социальнай боппуруостарга солбуйааччы Нюргуяна Илларионова, улуустааҕы культура управлениетын салайааччыта Иван Иванов, Соморсун нэһилиэгин баһылыга Алексей Кононов, Амматааҕы кииннэммит бибилэтиэкэ дириэктэрин солбуйааччы Светлана Макарова, кыраайы үөрэтэр салаа кылаабынай бибилэтиэкэрэ Вероника Стручкова, Сулҕаччы нэһилиэгин баһылыгын солбуйааччы Василий Неустроев, Дмитрий Флегонтов — Бөҕө Тоҥус ииппит кыра уола Дмитрий Феофанов уонна Соморсун тэрилтэлэрин салайааччылара истиҥник эҕэрдэлээтилэр. Мээндигиттэн Матрена Захарова «Иэйии» литературнай түмсүүтэ, Соморсун орто оскуолатын учууталлара таптал, олох туһунан үйэлээх хоһооннорун үрдүк иэйиилээхтик ааҕан иһитиннэрдилэр. Семен Капитонов кинигэҕэ киирбит «Булчут ырыата» хоһоонугар Соморсуннааҕы «Дархан» кулууп хормейстера, эдэр кэскиллээх ырыа айааччы Айаал Белолюбскай бэртээхэй мелодия суруйан, бэйэтэ салайар оскуола оҕолорун «Ыллыктар» ВИА тыыннаах музыкатын доҕуһуолугар эрчимнээхтик толорон, көрөөччүлэр биһирэбиллэрин ылла. Бу күн Соморсун кылаабынай бибилэтиэкэрэ Ксения Давыдова бэйиэт кинигэлэринэн баай ис хоһоонноох быыстапкатын сэргии көрдүбүт. Дьоро киэһэни Маргарита Лазарева сахалыы хомоҕой тылынан кэпсээн-ипсээн бэрт истиҥник салайан ыытта.
Аҕыйах хонугунан Семен Спиридонович Булун улууһугар Лаптев муора кытылыгар Быков Тумул бөһүөлэгэр айаннаары кынатын куурда сылдьар. Онно барыан иннинэ баҕатын хоту аар тайаҕатыгар бултаан-алтаан, астына-дуоһуйа сынньанан, кинигэтин сүрэхтээн санаата көтөҕүллэн, көнньүөрэн сылдьар. Онуоха төрөөбүт түөлбэтин дьоно-сэргэтэ Семен Спиридоновичка эһиил Соморсуҥҥа саҥа кулууп аһыллар үөрүүлээх малааһыныгар өссө биир саҥа кинигэтин сүрэхтииригэр улахан накаас түһэрдилэр. Онон мантан кыһын туундара киэҥ киэлитин ытыллар буурҕа тойугар, хараҥа уһун түүннэргэ төрөөбүт Амматыгар ахтылҕанын саҥа кинигэ оҥорон таһаарыа диэн эрэнэ күүтэбит.
Вера ИВАНОВА.