Амма Наахара нэһилиэгэр ахсынньы тымныытын аахсыбакка ааһан эрэр сыл ситиһиилэрин, кыайыыларын, ону тэҥэ туох кыаллыбатаҕын кэпсиир баһылык Захар Александров сыллааҕы үлэтин отчуота буолан ааста. Быйылгы отчуокка тэрилтэ бары салайааччылара үлэлэрин бэйэлэрэ сырдаппыттарын олохтоохтор биһирээтилэр.
Сыллааҕы отчуот үлэ хайысхаларынан чуолкайдык сирдэтэн оҥоһуллубут. Манна баһылык слайданан көрүллүбүт бүддьүөттэн үп-харчы нөҥүө үлэ хайдах, туохха ыытыллыбытын баарынан отчуоттаата. Маны сэргэ араас бырагыраамалар, бырайыактар баалларын сөпкө туһаннахха, олохпут усулуобуйатын тупсарыахха сөбүн нэһилиэнньэҕэ сөптөөхтүк өйдөтөн иһитиннэрдэ.
Отчуоттан быһа тардан: «Байыаннай дьайыыга 12 миэтирдээх сетка оҥоһулунна, көмө харчыта бириэмэтинэн хомуллан ыытыллар. Олоҥхо ыһыаҕар эмиэ улуус олохтоохторо буоларбытынан квартал аайы харчы хомуллар. Сайыҥҥы баһаарга 13 эр санаалаах дьоммут тахсан уот тэнийбэтин туһугар өҥөрүк куйааска үлэлээтилэр. Улууска ыытыллар аахсыйаларга, тэрээһиннэргэ нэһилиэк көхтөөхтүк кыттар. Былааннаммыт үлэ барыта баран иһэр диэн бэлиэтиибин» — диир баһылык Захар Семёнович.
Былырыын ОДьХ салайааччытынан анаммыт Андрей Захаров үлэ сүрүн хайысхаларын маннык кэпсиир: «18 үлэһит үлэлиир, орто саас 43 тэҥнэһэр. Быйыл 20 ыал ититиигэ холбонон нэһилиэкпитигэр 70% сылаас киирдэ. 1 килэмиэтир усталаах турбаны сабыы үлэтэ ыытылынна. Быйыл сайын үлэһиттэрим түөрт оҕото Анапаҕа баран оҕо лааҕырыгар сынньаннылар. Инникитин олохтоохтор ититии ситимигэр холбонон кыһыҥҥы кэмнэргэ дьиэҕитигэр сылааһынан хааччынын диэн баҕа санаабын этэбин».
Михаил Григорьев аатынан нэһилиэк спортивнай саалатын дириэктэрэ Мария Заборовская: «Быйылгы сылга түөлбэнэн түөрт улахан күрэҕи ыыттыбыт. Улууска нэһилиэктэр икки ардыларыгар ыытыллар 14 күрэххэ кытынныбыт. Кыра нэһилиэктэргэ бастаан иһэбит. Нэһилиэккэ оскуола үөрэнээччилэригэр араас күрэхтэри ыытан оҕолору түмэбит. Сайын Аммаҕа ыытыллыбыт Өрөспүүбүлүкэтээҕи доруобуйаларынан хааччахтаах дьон спартакиадаларыгар Владислав Константинов, Александра Устинова кыттан ситиһии сиэтиилээх дойдуларыгар кэлбиттэринэн киэн туттабыт. Күһүөрү устудьуоннар этэрээттэрин кытта сканди хаамыы буолбута. Оҕунан ытыыга успуорт маастара Максим Кудрин балаҕан ыйыгар ыыппыт маастар кылааһыгар элбэх киһи сылдьыбыта. Нэһилиэкпитигэр балаҕан ыйын 15 күнүгэр Николай Архипов сырдык кэриэһигэр ыытыллыбыт велогонкаҕа элбэх оҕо-аймах кыттыбыта. Быыстала суох элбэх күрэхтэри, интеллектуальнай оонньуулары түөлбэлэр икки ардыларыгар ыытабыт. Быйыл сонун тэрээһиҥҥэ тэрилтэттэн биирдии киһи Аммаҕа киирэн ГТО туттаран кытынныбыт. Ахсынньы 9 күнүгэр улуустааҕы комплекснай спартакиада чэрчитинэн мас тардыһыы күрэҕэ биһиэхэ ыытыллыбыта. Улуустар мас тардыһар помост бэлэх тутан үөрдүбүт»,- диэн отчуоттаата.
Маны тэҥэ быраас Анастасия Ефремова, орто оскуола дириэктэрэ Василий Яковлев, бэтэринээринэй пуун салайааччыта Альбина Устинова, «Дуораанчык» уһуйаан сүрүннүүр иитээччитэ Галина Мартынова, олохтоох библиотека салайааччыта Екатерина Унарова, «Түмэн» сынньалаҥ киинин дириэктэрэ Сардаана Лебедева нэһилиэккэ үлэлэрин отчуоттаатылар.
Баһылык ытыс тыаһын ортотугар биһиги нэһилиэккэ чөл олоҕу өрө тутар, ыччаты кэрэҕэ угуйар, сайын өҥөрүк куйааска, кыһын томороон тымныыга күннэтэ скандинавскай хаамыынан дьарыктанар Далбар хотуттарга меценат, нэһилиэк убаастыыр киһитэ Руслан Федотов бэлэҕин харыйа уонна харыйа оонньуурдарын туттарда. Өйдөтөр эбит буоллахха ийэлэрбит, эбэлэрбит сыллата айылҕаҕа харыйа илдьэ тахсан симииллэр. Россия каналыттан былырыын барыбытын «Зима начинается с Якутии» диэн аахсыйаҕа кыттан эҕэрдэлээн тураллар. Аҕа баһылыкпыт өрүү нэһилиэкпитин өйүүр, ханнык да түгэҥҥэ көмөтүн утары уунар Руслан Еремеевичкэ, нэһилиэк общественнай хамсааһынын кыттыылаахтарыгар, үлэнэн күүрэр барыга көхтөөх нэһилиэк олохтоохторугар эҕэрдэ этиитин, махтал тылларын тириэртэ.
Онтон олохтоохтор араас боппуруостарыгар эппиэттэри иһиттибит. Олохтоох көҕүлээһини өйүүр бырагыраамаҕа кыайбыт спортивнай балаһаакка тутуута хаһан салҕанарын, нэһилиэк ититэр ситимҥэ киириитин биир хочуолунай кыайыа дуо, Болугур заправката үлэлиирэ буоллар диэн ыйытыктар, этиилэр киирдилэр. Нэһилиэк дьаһалтатын отчуотун «Биһириибин» — диэн Матрёна Макарова, Марианна Чен, Сардаана Лебедева тыл эттилэр, баҕа санааларын тиэртилэр. Олохтоох дьаһалта хамаандата биир санаалаах, сыаллаах — соруктаах үлэлиир буолан таһымнаахтык уонна кыахтаахтык үлэлиир диэн бэлиэтээтилэр. Олохтоох дьаһалта хамаандатыгар баһылык Захар Александров, баһылык солбуйааччыта Сахаяна Михайлова, кылаабынай исписэлиис Айыына Бадмаева, спорт исписэлииһэ Мария Заборовская, эдэр ыччаты кытта үлэ исписэлииһэ Мичил Ефремов, тыа хаһаайыстыбатын исписэлииһэ Елена Егорова, сир боппуруостарыгар исписэлиис Виктор Гаврильев, кылаабынай бухгалтер Анастасия Александрова, сүрүннүүр бухгалтер Айыына Михайлова, бухгалтер Ньургуйаана Илларионова, финансист Мария Устинова биир сомоҕо буолан үлэлэрэ биһирэннэ. Ити курдук сылы түмүктүүр олохтоох дьаһалта отчуота дьоһуннук ааста.
Ирина Корякина – Олесова.