Абаҕа нэһилиэгэр депутаттар, ветераннар Сэбиэттэрин, Духуобунас киинин көҕүлээһиннэринэн «ДЕБАТЫ» диэн сэргэх тэрээһин буолан олохтоохтор болҕомтолорун тардан, элбэх киһини муста. Бу күн “Абаҕа нэһилиэгэ” муниципальнай тэриллии баһылыгын дуоһунаһыгар кандидаттар Карманов Игорь Гаврильевич, Павлов Кирилл Иннокентьевич, Семенов Максим Владимирович быыбардааччылары кытта утары көрсөн олорон туох санааттан баһылык дуоһунаһыгар турунан эрэллэрин сырдаттылар, бэйэлэрин санааларын үллэһиннилэр.
Тэрээһини Абаҕа нэһилиэгин Бочуоттаах олохтооҕо, ветераннар Сэбиэттэрин бэрэссэдээтэлэ Маргарита Егоровна Смитина быыбар хаамыытын, хайдах буолуохтааҕын кэлбит дьон иннигэр быһааран, кандидаттары аһаҕас кэпсэтиигэ көҕүлээн, иилээн-саҕалаан ыытта. Кандидаттар үһүөн төрүт Абаҕа уолаттара, күүстээх санааны ылынан баһылыкка турбуттарын нэһилиэк дьоно-сэргэтэ өйүүллэрин, биһирииллэрин биллэрдилэр.
Дебат хаамыытыынан кадидаттар бэйэ-бэйэлэригэр ыйытыктары бэристилэр, эппиэттээтилэр. Дебаты тэрийбит комиссия бэлэмнээбит нэһилиэк тыын боппуруостарыгар эппиэттэри биэрдилэр, санааларын, көрүүлэрин эттилэр. Ол кэннэ олохтоохтор хас биирдии кандидакка суругунан уонна тылынан ыйытыктарыгар эппиэттээтилэр. Түмүгэр кандидаттар итэҕэллээх дьонноро бэйэлэрин кандидаттарын өйүүргэ ыҥыран уоттаах-төлөннөөх тыллары эттилэр. Быыбардааччылар кандидаттар тылларын-өстөрүн истэн, сэҥээрэн, Абаҕабыт инники сайдар дьылҕатыгар сөптөөх суолу тобулуоҕуҥ диэн уолаттар күүстээх санааларын өйүүллэрин биллэрдилэр.
Маннык дебаттар инники да быыбардарга элбэх кандидат турар түгэнигэр наадалааҕын уонна көдьүүстээҕин Абаҕалар биһирээтилэр.
Розалия ГОГОЛЕВА.