Дьокуускай куорат «Дохсун» спортивнай комплексыгар «Байанай бэлэҕэ» диэн саха төрүт ох саатынан ытыыга өрөспүүбүлүкэтээҕи аһаҕас күрэх ыытылынна. Манна оҕолуун улахан дьоннуун 320 охчут күөн көрүстэ. Бу күрэххэ Амматтан сэттэ спортсмен кытынна.
Ол курдук Эмистэн Альберт Соловьев, Амматтан Юрий Сирдитов, Николай Николаев, Ньургуйаана Шестакова, Надежда Филиппова уонна Любовь, Егор Барановтар кытыннылар. Охчуттар биирдиилээн бастыыр иһин куобах, кус, тииҥ көрүҥнэргэ күөн көрүстүлэр. Манна Барановтар дьиэ кэргэн ситиһиилиин сиэттистэ. Егор куобахха 1-кы миэстэ, куска 3-с миэстэ, троеборьеҕа 2-с миэстэни ылары ситистэ уонна бу күрэххэ муҥутуур кыайыылаах үрдүк аатын сүктэ.
Онтон Любовь бэтэрээн дьахталларга 42 киһиттэн ортоку сырытта уонна III спортивнай разряды толордо. Амматтан сылдьар Николай Николаев эр дьоҥҥо 75 охчуттан 15-с миэстэҕэ тахсан эмиэ III спортивнай разряды ылары ситистэ. Саҥа кыттааччылар да ситиһиилээхтик кытыннылар.
Бу иннинэ аҕай Томпо улууһугар снайпер Федор Охлопков дойдутугар Хаандыгыга Егор Баранов Амматтан соҕотох баран күрэххэ кыттыбыта. Томпо күрэҕэ алта салааҕа арахсан ыытыллыбыта. Ол курдук 11- 17 саастарыгар диэри, 18- 50 саастарыгар диэри уонна 50 саастарыттан үөһэ саастаахтар. Амма ааспыт сылын биир чулуу спортсмена Егор Баранов уопсай түмүгүнэн бэтэрээн эр дьоҥҥо чемпион үрдүк аатын сүгэн Томполор кубоктарын тутан, Амма улууһугар кыайыы өрөгөйдөөх кэлбитэ. Амма аатын ааттатар охчуттарбытыгар өссө үрдүк ситиһиилэри баҕарыаҕын!
Ирина КОРЯКИНА-ОЛЕСОВА