«Фаворит» кулуупка бильярд күрэҕэр 70-тан аҕа уонна 50-гар диэри саастаахтар хас да бөлөҕүн иккилии-үстүү эргииргэ кииристилэр. Кыттааччы элбэх, онон олус уһаан-тэнийэн хаалыыһыкпыт диэннэр түүн хойукка диэри оонньоотулар.
Эр дьон бүгүн күн устата киирсэннэр, киэһэ финалга бастыҥнар күөн көрсүөхтэрэ. Дьахталлар эр дьонтон итэҕэһэ суох үчүгэй оонньуулары көрдөрдүлэр. Сэттэ дьахтар эрбии тииһинии тэбис-тэҥ эрийсиилээх киирсиилэриттэн Октябрина Яковлева чорбойон бастакы кыһыл көмүс мэтээл Тааттаҕа барда. Бэйэлээх бэйэбит кыыспыт Эмистэн Галина Куприянова кыранан баһыйтаран иккис миэстэҕэ тигистэ. Үһүс миэстэни Чурапчыттан Мария Игнатьева уонна Сатаҕайтан Дария Стручкова ыллылар.
Кыайыылаах кэрэ аҥардар урбаанньыт Людмила Куприянова туруорбут сыаналаах бириистэрин тутан үөрдүлэр-көттүлэр.
Олег ЕГОРОВ