Е.А.Шишигин аатынан Сатаҕай орто оскуолатын бэтэрээн учуутала Ольга Терентьева Дойду Бэрэсидьиэнэ Владимир Путин Ыйааҕынан Арассыыйа үтүөлээх учууталын аатын ылла. Бу үрдүк наҕарааданы Дьокуускай куоракка атырдьах ыйын 23 күнүгэр Ил Дархан Айсен Николаев учууталлар атырдьах ыйдааҕы сүбэ мунньахтарыгар үөрүүлээх-быһыыга-майгыга туттарда.
Бэҕэһээҥҥиттэн Дьокуускай куоракка үгэс буолбут учууталлар, педогогика общественноһа атырдьах ыйынааҕы улахан сүбэ мунньахтара буола турар. Бу улахан тэрээһиҥҥэ биһиги оскуолабыт учууталлара быйылгы үөрэх дьылыгар саҥа соруктары туруорсаллар. Мунньахха биир улахан үөрүүлээх түгэнинэн биһиги бэтэрээн учууталбытыгар, “Дети Саха –Азия” норуоттар икки ардыларынааҕы фонда стипендиатыгар, Учууталлар учууталлара, РФ Үөрэҕириитин туйгуна, РФ “Гражданнар көҕүлээһиннэрин сайыннарыыга кылааттарын иһин” бэлиэ хаһаайыныгар Терентьева Ольга Семеновнаҕа үүнэр ыччаты үөрэтиигэ, иитиигэ үгүс өҥөтүн иһин “Российскай Федерация үтүөлээх учуутала” диэн үрдүк наҕарааданы туттардылар.
“Бүгүн биһиэхэ икки бүк улахан үөрүүлээх күммүт буолар. Пленарнай мунньахха биһиги Ил Дархаммыт Айсен Сергеевич Николаев тапталлаах учууталбытыгар Терентьева Ольга Семеновнаҕа “Российскай Федерация үтүөлээх учуутала” судаарыстыбаннай наҕарааданы туттарбытыттан олуһун үөрдүбүт, долгуйдубут. Ольга Семеновна Е. А. Шишигин аатынан Сатаҕай орто оскуолатыгар харыс даҕаны сири халбаҥнаабакка 45 сыл устата биир оскуолаҕа олус таһаарыылаахтык, эҥкилэ суох үтүө суобастаахтык үлэлээн кэллэ. Кини үөрэппит оҕолоро өрөспүүбүлүкэбит араас муннуктарыгар олус ситиһиилээхтик үлэлии-хамсыы сылдьаллар. Кинилэр истэригэр бааллар педагогическай наука кандидаттара, араас тэрилтэ салайааччылара. Үөрэппит оҕолоро учууталларын бары истиҥник саныыллар, махтаналлар. Үөрэппит учууталым “Педагог уонна наставник” сылыгар сөп түбэһиннэрэн бу үрдүк наҕарааданы ылбыта биһиэхэ олус үөрүүлээх. Биһиги учууталбытынан олуһун киэн туттабыт. Өссө төгүл бу үрдүк наҕарааданан эҕэрдэлиибит уонна күндү учууталбытыгар чэгиэн- чэбдик доруобуйаны баҕарабыт”, — диэн үөрүүлээх түгэнтэн оскуолабыт дириэктэрэ Иванна Шишигина эҕэрдэтин ыытар.
“Ольга Семеновна учуутал идэтигэр олус бэриниилээх, үлэтин дэгиттэр баһылаабыт уһулуччулаах киһи, ытыктанар учуутал. Билигин бэйэм уһуйааччы буолан тураммын, Ольга Семеновнаны өссө үрдүктүк сыаналыыбын. Кини хайдах курдук оҕолору математика курдук уустук предметкэ интэриэһиргэтэн үөрэтэрэ, нэһилиэккэ, улууска, өрөспүүбүүкэҕэ ыытыллар олимпиадаларга ситиһиилээхтик кытыннарара элбэх үлэттэн тахсарын бэлиэтиибин. Оскуолаҕа үөрэнэр сылларбар оҕолор математика уруогар сөбүлээн үөрэнэр этибит. Мин геометрия уруогун олус сөбүлүүр этим. Ольга Семеновна олус тиийимтиэтик быһаарар, олус кыһаллан үөрэтэр этэ. “Кини курдук учууталлар- оҕо дьолугар кэлбит учууталлар” диэн бэйэм сыанабылбын биэрэбин уонна бу математика курдук уустук предмеккэ үчүгэйдик үөрэммитим олохпор кытта туһалаата. Ольга Семеновна учуутал быһыытынан биһиги үлэһит дьон буолан тахсарбытыгар олус элбэҕи биэрбитэ. Уустук боппуруоһу быһаарарга, туруоруммут сыалы ситиһэргэ, дьаныардаах буоларга, араас ньыманы туттарга, сатабыллаах буоларга үөрэппитэ олохпутугар олус туһалаата. Ольга Семеновнаны үрдүк наҕарааданан ис сүрэхпиттэн эҕэрдэлиибин, үчүгэй доруобуйаны, уһун дьоллоох олоҕу баҕарабын. Оҕолорун, үөрэнээччилэрин үөрүүлэрэ үрдүктэн үрдүккэ кынаттыы турдуннар”, — диэн эбии үөрэхтээһин педагога, СӨ ырыа ааптардарын сойууһун чилиэнэ, СӨ култууратын туйгуна Милена Борисова санаатын үллэстэр, учууталын эҕэрдэлиир.
“Убаастабыллаах коллегабыт, аҕа наставникпыт Ольга Семеновнана өр сыллаах үлэтэ сыаналанан иитэр-үөрэтэр үлэҕэ учууталлары үөрэппит, опытын бэрсибит үлэтэ, барыта сыаналанан быйыл “Учуутал уонна наставник” сылыгар сөп түбэһиннэрэн Российскай Федерация үтүөлээх учуутала буолбутунан киэн туттан туран, итиитик истиҥник эҕэрдэлиибит. Кини чахчы даҕаны өр сылларга элбэх көлүөнэ ыччаты иитэн, ахсаан курдук ыарахан предметкэ үөрэтэн, элбэх араас хайысхаларга специалист буолан тахсалларыгар олук уурбут биир убаастанар учууталбыт буолар. Ольга Семеновна оскуола олоҕор эрэ буолбакка бүтүн нэһилиэк, улуус олоҕор эмиэ биир активнай кыттааччы буолар. Ол курдук кинини кыраайы үөрэтээччи да диэххэ сөп, төрүччүнү үөрэтиигэ улахан кылааттаах уонна научнай- чинчийэр үлэҕэ куруук кини үөрэнээччилэрэ ситиһиилээх буолалларын бэлиэтиибит”, – диэн оскуолабыт дириэктэри үөрэх чааһыгар солбуйааччы Надежда Адамова эмиэ бэйэтин санаатын эттэ.
“Убаастабыллаах учууталым Ольга Семёновна! Эйиигин бу үрдүк ситиһиигинэн итиитик-истиңник, долгуйан туран эҕэрдэлиибин! Өр сылларга үлэлээбит сыралаах үлэҥ бүтүн Арассыыйаҕа биллибитинэн киэн туттабын! Алын кылаастан саҕалаан оскуоланы бүтэриэхпэр диэри “Инникигэ хардыы” научно-практическай конференцияҕа үлэ бөҕөтүн үлэлэлээн, ситиһии бөҕөтүн ылбыппыт, ол кэмнэри наһаа истиңник, сылаастык саныыбын. Билигин бэйэм учуутал буолан тураммын, дьэ кырдьык бу үлэни өйдөөммүн, сиртэн хааллааңңа диэри бүк бүппэт махталбын тиэрдэбин!”- диэн оскулолабыт 2016 сыллаах выпускницата Надя Неустроева эҕэрдэтин ыытар.
“Ольга Семеновна үрдүк үөрэҕи бүтэриэҕиттэн 45 сыл устата биир оскуолаҕа олус таһаарыылаахтык үлэлээн кэллэ. Математика курдук уустук предметкэ элбэх оҕону үөрэттэ, уһуйда. Үгүс оҕону научнай-чинчийэр үлэҕэ сыһыаран үлэлэттэ. Үлэтин түмүгэ үгүс ситиһиилэрдээх. 40 сыл тухары методическай холбоһук салайааччытынан үлэлээн, кылаас салайааччытынан, наставник быһыытынан үлэтин уопута улууска, республикаҕа, Арассыыйаҕа тарҕаммыта. Элбэх эдэр уучууталлар үүнэн-сайдан тахсалларыгар улахан көмөлөөх. Элбэх чинчийэр үлэни ыытта. Нэһилиэкпит олоҕор улахан суолталаах үлэни салайан нэһилиэк төрүччүтүн оҥорууга сүҥкэн үтүөлээх. Ольга Семеновна олоҕун анаабыт үлэтэ үрдүктүк сыаналаммытынан, долгуйан тураммын эҕэрдэлиибин. Ыраас чэбдик олоҕу баҕарабын, улахан дьиэ-кэргэн үөрүүтэ, оҕолорун, сиэннэрин тапталлара үөрүүгүн үксэтэ турдуннар”- өр кэмҥэ бииргэ үлэлэһэр кэллиэгэтэ Наталия Ивановна Борисова үөрүүтүн үллэстэр.
Ольга Семеновна үрдүк наҕараадаҕа тиксиитэ бу буолар үгүс үөрэнээччи биһирэбилэ, бараммат махтала. Бүгүн учууталбытыгар элбэх төрөппүт, дьон-сэргэ махтанар, киэн туттар.
Христина СКРЯБИНА