Бөтүҥ орто оскуолатын киэҥ уораҕайыгар бу сыл биир суолталаах, күүтүүлээх күрэҕэ ыытылынна. “Сыл бастыҥ учуутала – 2023” уонна “Эдэр педагог – 2023” улуустааҕы түһүмэҕин кыайыылаахтарынан кимнээх ааттанныларый?
Бэҕэһээ күн устата Бөтүҥ орто оскуолатын дьиэтэ өрө тигинээн олордо. Бииртэн биир интэриэһинэй аһаҕас уруоктар, маастар-кылаастар ыытылланнар экспертнэй хамыыһыйа чилиэннэрэ идэлэригэр бастыҥнары быһааралларыгар уустук соҕус буолла. Быйылгы тэрээһин кыттааччыта төһө даҕаны ахсааннаах буоллар, күрэх күүрээннээхтик, сытыытык барда. Олох, үөрэх ирдэбиллэригэр сөп түбэһиннэрэн учууталлар техническэй, электроннай көмө матырыйааллары хото туһанар буолбуттара харахха быраҕыллар. Бу “компьютер үйэтин” оҕотун интэриэһин тардарга, уруок тиэмэтин тиэрдэргэ тирэх буолара саарбаҕа суох.
“Сыл бастыҥ учуутала” ааты сүгэр иһин 5 кыттааччы: Амматааҕы 1№-дээх оскуола нуучча тылыгар уонна литературатыгар учуутала Яна Николаевна Чемезова, Сатаҕай орто оскуолатын математикаҕа учуутала Айталина Петровна Спиридонова, Бөтүҥ орто оскуолатын нуучча тылыгар уонна литературатыгар учуутала Айталина Гаврильевна Иванова, Болугур орто оскуолатын химияҕа, биологияҕа учуутала Ганира Владимировна Нестерова уонна Соморсун орто оскуолатын технологияҕа учуутала Артур Андреевич Макаров маастарыстыбаларын көрдөрдүлэр.
Оттон оҕону иитии-үөрэтии эппиэтинэстээх үлэтин киэҥ киэлитигэр саҥа үктэнэн эрэр эдэр учууталлар ортолоругар бастыҥ аатын ылаары Соморсунтан Надежда Викторовна Неустроева, Чакыртан Татьяна Андрееевна Барашкова, Алтантан Ольга Васильевна Никифорова, Амма 1№-дээх оскуолатыттан Мария Васильевна Слепцова, Сатаҕайтан Ньургун Павлович Давыдов, Чакыртан Уйгулана Семеновна Варламова, Бөтүҥтэн Егор Трофимович Никифоров үөрэтэр-такайар дьоҕурдаахтарын хамыыһыйаҕа итэҕэттилэр.
Эрбии биитин курдук эрийсиилээх эксээмэннэри тулуурдаахтык туораан, күн киэһэриитэ кыттааччылартан быйыл кимнээх бастыҥ ааты ылбыттара билиннэ. Экспертнэй хамыыһыйа чилиэнэ, Амматааҕы лиссиэй учуутала, “Сыл бастыҥ учуутала – 2023” өрөспүүбүлүкэтээҕи күрэх Лауреата Миралюбовь Максимовна Архипова үрдүкү сценаттан “Эдэр педагог — 2023” муҥутуур кыайыылааҕынан Бөтүҥ орто оскуолатын учуутала Егор Никифоров буолбутун хабыллар ытыс тыаһын ортотугар иһитиннэрдэ. Оттон улуустааҕы үөрэх управлениетын салайааччы Юрий Шишигин “Сыл бастыҥ учуутала – 2023” кыайыылааҕын кубогын Сатаҕайтан Айталина Спиридонова ылбытынан эҕэрдэлээтэ. Кыайыылаахтар, лауреаттар тэрийээччилэртэн, үөрэх үлэһиттэрин профсоюһуттан сыаналаах бириистэри тутан үөрүүлэрэ, ону кытта эппиэтинэстэрэ өссө үрдээтэ.
«Амма олоҕо» хаһыат.