Эмис нэhилиэгэр Е.А. Захарова аатынан культура киинигэр тыыл бэтэрээнэ, Учууталлар учууталлара, Социалистическай күрэхтэр кыайыылаахтара, нэhилиэкпитигэр дуобат сайдыытын төрүттэспит Степанов Тарас Николаевич төрөөбүтэ 100 сылыгар, ону сэргэ Арассыыйаҕа Уhуйааччы уонна педагог, Саха сиригэр физкультурнай хамсааһын 100, нэhилиэккэ оскуола төрүттэммитэ 100 сылларыгар аналлаах улуус нэһилиэктэрин икки ардыларыгар ыытыллар спартакиада чэрчитинэн дуобат күрэҕэ бэрт тэрээһиннээхтик буолан ааста.
Күрэххэ нэhилиэктэртэн 5 киhилээх 10 хамаанда кытынна. Сытыы киирсиилэр түмүктэринэн кыайыылааҕынан Бөтүҥ нэhилиэгин хамаандата тахсан мэтээллэринэн, Тарас Николаевич Степанов оҕолоро олохтообут убаһа этинэн, сыаналаах бириистэринэн, Эмис 8-с кылаастаах оскуолатын выпускниктара олохтообут харчынан бирииhи туттулар. 2-с миэстэҕэ Чакыр нэhилиэгэ тахсан, Тарас Николаевич оҕолоро олохтообут биир куул күндүөпкэ балыгынан, сыаналаах бириистэринэн, Эмис нэhилиэгин «Көлүкэчээн» түмсүү (салайааччы Михайлова Ольга Саввична) олохтообут харчынан бириистэринэн, 3- с миэстэни Амма нэhилиэгин хамаандата ылла уонна Тарас Николаевич оҕолоро олохтообут биир куул собо балыгынан, сыаналаах бириистэринэн наҕараадаланнылар. Күрэх сүрүн судьуйатынан спорткомплекс дириэктэрэ Валентин Николаев улэлээтэ. Эмис нэһилиэгэ МТ дьаһалтатын баһылыга Прокопий Бубякин анал бирииhин Болугур нэhилиэгин баhылыга Андрей Петров, дьаhалта олохтообут бириистэрин улуус күүстээх дуобаччыттара Андрей Федотов, Ньургун Непомнящай, Уйгу Варламова, “Турнир саастаах оонньооччута” анал бирииhи олохтоох оскуола (директор Гаврил Захаров) туруорбутун Бөтүҥтэн Тамара Иванова, нэhилиэкпитигэр дуобат сайдарын туhугар күүскэ үлэлэhэ сылдьар ытык киhибит, улуус нэhилиэк бочуоттаах олохтооҕо, “Гражданскай килбиэн” бэлиэ хаhаайына, дуобат тренера Алексей Гаврильев анал бирииhин Амматтан Иван Бураев туттулар.
Күрэх бэрт тэрээһиннээхтик ааста. Кыттааччылар бары астынан тарҕастылар. Уот да бара сырыттар барыта этэҥҥэ ааста. Күрэхтэһии кэмигэр кэлбит дьону, кыттааччылар сылаас аһынан Светлана Куприянова, Аграфена Николаева хааччыйдылар.
“Аҕабыт Тарас Николаевич Степанов аатынан дуобат күрэҕин үрдүк таһымнаахтык тэрийэн, учууталлаабыт сылларын ахтан -санаан, киэҥ ис хоһоонноох көрдөрөр быыстапкалары тэрийэн бэртээхэй тэрээһини оҥорбуттарыттан биһиги оҕолоро, сиэннэрэ долгуйа үөрдүбүт. Турнир элбэх кыттааччылаах, тыҥааһыннаах киирсиилэрдээх сэргэхтик ааста. Биир дойдулаахтарбыт, эмистэр хайа да күн түргэн — тарҕан тэрээһиннээх хамсаныылара, ыалдьыттарга анаан астыыр минньигэс дэлэй астара, үлэҕэ-үөрэххэ , култуура , спорт эйгэтигэр эргиччи дьоҕурдара биһигини куруук сөхтөрөр. Ол туһунан ханна да сырыттарбыт киэн тутта ахтабыт. Дойдубут дьонугар бу курдук түмсүүлээх үлэҕит кыайыынан кынаттана, үөрүүнэн үрдүү турарарыгар баҕарабыт, дириҥ махталбытын тириэрдэбит”, — диэн Тарас Николаевич оҕолоро сиэннэрэ санааларын тириэртилэр.
Анжелика ИВАНОВА