Амма нэһилиэгин “Дружба” спортсаалатыгар улуус бэтэрээннэрин ортотугар саахымакка, теннискэ уонна буулдьанан ытыыга күрэх ыытылынна. Бу күрэх түмүгүнэн бастыҥнар өрөспүүбүлүкэҕэ ыытыллар бэтэрээннэр спартакиадаларыгар улуус чиэһин көмүскүөхтэрэ. Күрэх түмүктэрин билсиэҕин.
Күрэҕи Амма улууһун бэтэрээннэрин Сэбиэтин бэрэссэдээтэлэ Мария Захарова иилээн -саҕалаан ыытта. Хамаандалар спорт үс көрүҥэр: буулдьанан ытыыга, теннискэ уонна саахымат оонньуутугар күрэс былдьастылар. Судьуйаларынан теннис күрэҕэр Семен Килбясов, буулдьанан ытыыга Степан Бурнашов, саахымакка Михаил Степанов, онтон кылаабынай судьуйанан Николай Гурьев үлэлээтилэр. Күрэхтэһии түмүгүнэн эр дьоҥҥо теннискэ I миэстэни Амма Наахараттан Прокопий Пахомов, II миэстэ Амма хамаандатыттан Леонид Макаров, III миэстэни Чапчылҕантан Владимир Аргунов ыллылар. Дьахталларга I миэстэ волонтера Елена Рысалиева (Чапчылҕан), II миэстэ Лидия Пестерева (Амма), III миэстэ Амма Наахараттан Полина Осипова буоллулар.
Буулдьанан ытыыга эр дьоҥҥо 1-кы миэстэҕэ Алтантан Василий Борисов, 2-с миэстэҕэ Абаҕаттан Иван Захаров, 3-с миэстэҕэ Чапчылҕантан Павел Иванов таҕыстылар. Дьахталларга 1-кы миэстэ Дария Федорова (Чакыр), 2-с миэстэ Ольга Никифорова (Алтан), 3-с миэстэ Лариса Никифорова (Амма Наахара) буоллулар.
Саахымат күрэҕэр Амматтан Михаил Степанов 1 миэстэни, Амма Наахараттан Валерий Гарильев 2 миэстэни, Алтан нэһилиэгиттэн Александр Стручков 3 миэстэни ыллылар. Дьахталларга Амматтан Евдокия Сергеева бастаата, иккиһи Бөтүҥтэн Тамара Иванова, үсүһү Алтантан Александра Неустроева ыллылар.
Уопсайа түмүккэ саахымакка хамаанданан 1 миэстэ Амма нэһилиэгэ, 2 миэстэ Алтан нэһилиэгэ, 3 миэстэ Амма Наахара, теннискэ 1 миэстэ Чапчылҕан, 2 миэстэ Амма Наахара, 3 миэстэ Амма нэһилиэктэрэ уонна буулдьанан ытыыга 1 миэстэ Алтан, 2 миэстэ Чапчылҕан нэһилиэктэрэ буоллулар. Спартакиада бэрт сэргэхтик, өрө көтөҕүллүүлээхтик ааста. Бэтэрээннэрбит чөл эйгэни өрө тутан, дьарык гынан, эдэр көлүөнэҕэ холобур буолаллар.
Лариса НИКИФОРОВА — Баһылай кыыһа