Бөтүҥ агрооскуолатыгар сайыҥҥы үлэ саҕаланна

Бүгүн агро хайысхалаах Бөтүҥ орто оскуолатын оҕолоро нэһилиэккэ көҕөрдүү үлэтин кытары билим- практическай үлэлэрин саҕалаатылар.

Ол курдук оскуолабыт кураторын кытта, биир дойдулаахпыт Биология институтун сүрүн научнай үлэһитэ, тыа хаһаайыстыбатын билимин кандидата Федоров Иннокентий Аполлонович буолан иккис сылын «Хааччах» диэн сиргэ питомникка чинчийэр үлэ ыытабыт. Былырыын-быйыл быһа холоон 750 үнүгэстэри олортубут.

8 кылаас үөрэнээччитэ Онуфриев Гоша чинчийэр үлэтинэн, салайааччыларын кытта былырыын олордубут үнүгэстэрин кытта мээрэйдээн, саҥа титириктэри олордон кэллэ. Бу үлэтин сүнньүнэн элбэх билим-чинчийэр ааҕыыларга ситиһиилээхтик көмүскээбитэ. Салайааччыта Назарова Ида Иннокентьевна Бөтүҥ орто оскуолатын биология учуутала. Мантан сайын Гоша чинчийэр үлэтин салҕыы ыытар.

Бу саас алын сүһүөх кылаас оҕолоро Иннокентий Апполлонович бэлэхтээбит акация талах сиэмэтиттэн тулалыыр эйгэ уруогар олордубуттарыттан 1000 үнүгэс таҕыста. Олортон хас биирдии алын сүһүөх кылаас оҕолоро дьиэлэригэр илдьэ баран, олордон нэһилиэкпитигэр көҕөрдүү үлэтигэр кыттыстылар. Ону таһынан Сир күнүн көрсө «Мичээр» уһуйааҥҥа бэлэхтээбиттэрэ.

Иккис кылаас оҕолоро школьнай бизнес инкубатор иһинэн атыылаан үп-харчы кылаастарыгар киллэрилиннилэр. Учууталлара Давыдова Нюргуяна Ивановна.

Бүгүн 4 «Б» кылаас оҕолоро оскуола иһинэн рассадникка күһүҥҥүгэ бэлэмнээн акацияларын олортулар. Учууталлара Сидорова Екатерина Егоровна. Осипов Ньургун уонна Романова Эльвира сайын устата кэтээн, көрөн-харайан, чинчийэр дневниктарын толорорго соруннулар. Иннокентий Апполлонович нэһилиэк олохтоохторугар анаан көҕөрдүү үлэтин сөпкө ыытарга тэттик туһалаах сүбэлэри биэрдэ.

Маны таһынан  Амма кэрэ сиригэр Короленко хайатыгар үүнэр Амма «сакуратын» уонна Бөтүҥҥэ Уорай сиригэр үүнэр рододендрону тэҥнии тутан  чинчийэр үлэлэрин Дьячковская Катя, Шишигина Славиана 5 кылаас уонна 4 «а» үөрэнээччитэ Чупрова Индира яблоня талаҕын оскуолабыт тэлгэһэтигэр олордон, үөрэтэр-чинчийэр үлэлэрин саҕалаатылар.

Бу күн 7-8 кылаас уолаттара “Бөтүҥ” сопхуос бааһынатыгар бурдук ыһыытыгар көмөҕө таҕыстылар. 10 кылаас кыргыттара олоҥхо ыһыаҕар бэлэмнэнии чэрчитинэн практика бараллар.

  Мария Иванова.

Читайте дальше