Бүгүн саха норуотун биир аатырар чулуу тустууга Николай Захаров — Сахаачча 75 сааһын туолар өрөгөйдөөх күнэ. Бу бэлиэ күнүнэн Бөтүҥ орто оскуолатыгар араас тэрээһиннэр ыытыллаллар.
Бэҕэһээ физкультура учуутала Геннадий Иванович Назаров уонна библиотекарь Василина Васильевна Борисова үтүө киһи кылгас, эрээри чаҕылхай олоҕун сырдаттылар. Бүгүн кылаас аайы «Бэлэм буолга» тахсыбыт матырыйааллары туһанан кылаас чаастара буолаллар.
Сахаачча кылгас олоҕун чаҕылхайдык олорон ааспытынан биллэр. Ол курдук, 1966 сыллаахха, тохсус кылааска үөрэнэ сылдьан, ССРС тыа сирин спортсменнарын түһүлгэлэригэр чөмпүйүөн үрдүк аатын ылыан ылбыта. Кинини Чурапчы интернат-оскуолатыгар аатырбыт тустуу тренерэ Д.П. Коркин уһуйбута. Сахаачча спорт бары көрүҥэр дэгиттэр талааннаах эбит: волейбол, сүүрүү, баскетбол, хайыһар күрэхтэригэр өрүү бастыыра, миэстэлэһэрэ. Интернет ситимиттэн Николай Захаров туһунан интэриэһинэй чахчылары көрдүбүт: кыыс киниэхэ тапталыгар билиммит суруга, именной чаһыта уонна да атын. Библиотекаҕа кини туһунан кинигэлэртэн булан аахтыбыт, сэргээтибит. Эдэр сааһыгар олохтон туораабыта олус хомолтолоох эбит. Киниэхэ анаан биһиги биир дойдулаахпыт кыпраайы үөрэтээччи Нестерев Алексей Михайлович «Сахаачча» диэн хоһоон айбытын билистибит. Оттон биһиэхэ оскуолабыт спортивнай саалатын истиэнэтигэр Сахаачча мөссүөнэ ойууланан турар, онон биһиги, оҕолор, маннык чулуу биир дойдулаахпытынан киэн туттабыт.
Н.Е. Иванов аатынан Бөтүң орто оскуолатын онус кылаас үөрэнээччилэрин аатыттан Миша ИВАНОВ.