Быйылгы халаан уута Нам улууһун уонтан тахса нэһилиэгин ылбыта, олохтоохторго хоромньуну таһаарда. Ол иһигэр Бөтүҥ нэһилиэгэ эмиэ сааскы эмсэҕэлээбитэ. Амма улууһун Бөтүҥ нэһилиэгэ урут уруккуттан нэһилиэги кытта Бөрө бөтүҥнэр сыдьааннарын быһыытынан ыкса сибээстээхтик үлэлииллэр. Онон бу уустук кэмҥэ бөтүҥнэр биир ситимнээхтэрин туора хаалларбатылар.
«Биһиги нэһилиэк Бөрө Бөтүҥнэр диэн Бүлүү, Нам улуустарын бөтүҥнэрин кытта сибээстэһэн үлэлиибиппит хаһыс да сылыгар барда. Бу сааскы халаан уутугар Нам улууһун нэһилиэктэрэ ууга баран айылҕа иэдээнэ тахсыбытын бары билэ сылдьабыт. Онно Бөтүҥ нэһилиэгин олохтоохторо эмиэ эмсэҕэлээтилэр. Ол иһин бары быһаарынан кинилэргэ хайа да өртүнэн күүс-көмө буолабыт. Дьокуускай куоракка баар “Бөрө Бөтүҥ” түмсүүбүт Тамара Петровна Егорова салайыытынан Нам Бөтүнүгэр тахсан үлэлээн киирдилэр. Ол курдук Тамара Петровна олохтоохторго психологическай, юрист идэлээх, адвокат Николай Николаевич Иванов юридическай көмөлөрү оҥордулар. Ону кытта офтальмолог Анна Васильевна Филатова консультациялары, норуот эмчитэ Вероника Николаевна Семенова — Хомусчаана тустаах дьоҥҥо көмөнү оҥордулар. Биһиги эмиэ нэһилиэк өртүттэн харчыны көмөбүтүн ыыппыппыт, көмө салгыы хомуйуллар. Бу үлэни нэһилиэк дьахталларын түмсүүтүн салайааччыта Татьяна Григорьевна Сутакова сүрүннүүр», — диэн Бөтүҥ нэһилиэгин баһылыгын солбуйааччы Алексей Стручков сырдатта.
«Амма олоҕо» хаһыат